L.p.t.

geologik tadqiqotlar metodologiyasi va amaliyotiga, ayniqsa, geologik syomka va metallogenik tuzilishlarni oʻrganishga sezilarli oʻzgartirishlar kiritdi. U asosida geologik syomka ishlarining butunlay yangi konsepsiyasi ishlab chiqildi. L.p.t. nazariyasining asosiy mazmuni oʻtmishda sodir boʻlgan geologik jarayonlar masshtabini tiklash va oʻrganishdir. Uning yordamida Yer toʻgʻrisidagi ilmni yanada rivojlantirish, geologik moddalarning bir turdan ikkinchi turga oʻtishini, qayta shakllanish va rivojlanish jarayonlarini tiklash, Yerning tadrijiy rivojlanishi dinamikasini ifodalash mumkin boʻldi. Yangi konsepsiyaning metodologik asosi — tarixiy-geologik modellashdir, uning yordamida hududning rivojlanishini geodinamik modeli tuziladi. Bunday model geodinamik tahlil deb nomlanuvchi metod va usullar majmuasidan iborat. L.p.t. nazariyasi asosida ayrim olimlar baʼzi qazilma boyliklarni, jumladan neft va gaz konlari hosil boʻlishini tushuntirib berishga, neft-gaz geologiyasi fani yaratgan mukammal qoidalarni qisman boʻlsa-da oʻzgartirishga yoki inkor etishga urinmoqdalar. Metallogeniya muammolari: rudalar genezisi, yoshi va rudalanishning magmatizm bilan bogʻliqligi ham yangi nuqtayi nazardan koʻrib chiqildi. Ruda moddalari strukturaviy-moddiy majmuaning ajralmas qismi — geodinamik sharoitlar indikatori deb qaraladi, uning yordamida, birinchidan, konlarning hosil boʻlishini geodinamik sharoitlariga koʻra yangi tasnifini tuzish, ikkinchidan, hududda rivojlangan strukturaviy — moddiy majmuaga qarab, uning rudalanish potensialini (imkoniyatini) avvaldan aniqlash mumkin boʻladi. L.p.t.ning yechimini kutayotgan muhim muammolariga quyidagilarni kiritish mumkin: Yerning geologik rivojlanish tarixini tiklashda plitalar tektonikasi mexanizmini tatbiq etish, plitalarichi tektonikasi muammolari, okean va qitʼalarning geologik rivojlanishining oʻzaro bogʻliqligi, L.p.t. konsepsiyasida uchraydigan va oʻz yechimini topmagan masalalarni (chekka dengizlardagi spreding muammolari, litosfera qatlamlarining qavatlanishini burma hosil boʻlishiga va orogenezga taʼsiri, plitalar kinematikasi va sh.k.) bosqichma-bosqich hal qilish. L.p.t.ning asosiy vazifasi — yadro va mantiyada kechadigan jarayonlarni oʻrganish va ularni tektogenezni harakatga keltiruvchi kuch sifatida anglab yetishdir. L.p.t.ning kelajakdagi rivojlanish istiqboli Yerning umumiy tadrijiy rivojlanish konsepsiyasini ishlab chiqishdagi ishtiroki bilan aniqlanadi. L.p.t. bu konsepsiyaning tarkibiy qismini tashkil etishi mumkin.