kulmoq
кулмоқkulmoq
fl. 1. Yuz, koʻz harakatlari yoki turlicha tovush (tovushlar) bilan xursandligini, zavq-shavqini ifodalamoq, kulgi ifodalamoq.
Xoxolab kulmoq. Qahqaha urib kulmoq. Piq etib kulmoq. Hiringlab kulmoq. Muloyim kulmoq. Miyigʻida kulmoq.
Oldin Kamoliddin maxdum, unga ergashib Asad qori hi-hilab kuldi. — M. Ismoiliy, Fargʻona tong otguncha
Avaz, Feruz shaʼniga aytgan bir baytini eslab, murtida kuldi. — S. Siyoyev, Yorugʻlik
Hafiz Mirzamuhamedovichning kulib turgan chehrasi jiddiylashdi. — S. Karomatov, Oltin qum
Hamon kulib turgan koʻzlari bilan uni boshdan-oyoq kuzatib chiqdi. — Oʻ. Hoshimov, Qalbingga quloq sol
2. Kulgi bilan masxaralamoq, mazax qilmoq.
Oyi, siz sezasizmi, boynikida orqamdan kulishadi, gapirishadi, piching, kesatiq-mesatiq man yaqinlashsam, jim boʻlishadi [dedi Gulnor]. — Oybek, Tanlangan asarlar
Qandoq boraman kulmaydimi hamma. — Oʻ. Hoshimov, Qalbingga quloq sol
Kulsa kulaversin, bari bir oʻz fikrimda qolaman. — X. Toʻxtaboyev, Shirin qovunlar mamlakati
- Baxti kulmoq Baxt-omadi yurishmoq, baxtli boʻlmoq. Mingboshiga tegmagani bilan Zebixonning baxti kularmidi? — Choʻlpon, Kecha va kunduz
- Ichida kulmoq Hech qanday tashqi ifodasiz kulish holatida boʻlmoq. Qoʻchqor uning xayolidagi oʻylarini biladi va ichida kuladi. — O. Yoqubov, Er boshiga ish tushsa— Ishqilib, uyida boʻlmasin-da, — deydi umid bilan, soʻng oʻzining soddaligidan ichida kuladi. — S. Siyoyev, Yorugʻlik
- Ustidan kulmoq Masxarali munosabatda boʻlmoq, mazax bilan kulmoq. Men doʻzaxdan choʻchimasman, ustimdan kulma. Men chidarman, ammo qayda haqiqat, imon? — A. Oripov, Jannatga yoʻl