киришмоқ

фл. 1. Кирмоқ феълининг биргалик нисбати.

Ўқувчилар синфга киришди.

Булар талай ергача эмаклаб, талай ергача бағирлаб боргандан сўнг, бутазорга киришди. — А. Қаҳҳор, Олтин юлдуз

2. Бирор иш-ҳаракатни бажаришга бошламоқ.

Бу ишга яқинда киришдик. Ўқишга астойдил киришди.

Отабек ортиқ чидаб туролмади-да, рўмоли билан кўзини яшириб, йиғламоққа киришди. — А. Қодирий, Ўтган кунлар

Мен туғилган фикрни дарҳол ёзишга киришмайман. — Шукрулло, Жавоҳирлар сандиғи

3. Кишилар билан яқин муносабатга ўтмоқ, аралашиб, қўшилиб кетмоқ.

У [Саидий] бирмунча Шариф сингари танишлар орттирди, аммо булар билан киришиб кетолмас, бу янги доирада ўзини мусофирдай сезар эди. — А. Қаҳҳор, Сароб

Унинг қизи Гулнор, ошпаз Анорбойлар ҳам колхоз ҳаётига киришиб кетишади. — Муштум

4. Бир-бирига туташмоқ, ёпишмоқ.

Ғўза ўсиб кетибди. Шохи шохига киришиб кетибди. — И. Раҳим, Ихлос

Тишлари тушиб, жағи жағига киришиб кетган катта бувиси ҳассасини тақ эткизиб урди-ю башарасини тириштириб шанқий бошлади. — М. Исмоилий, Фарғона тонг отгунча

У ёʻл-ёʻл галстугини тортиброқ қўйган эди, кўйлагининг кенг ёқаси бир-бирига киришиб, галстугининг тугуни кўринмай қолди. — С. Анорбоев, Меҳр

5. Иссиқ, совуқ ёки нам таъсирида қисқармоқ (мато ҳақида).

Ҳозир ювганда киришмайдиган, дазмол қилинмайдиган, кийиш учун қулай матоларнинг хили кўп. — Газетадан

6. Белгиланган мақсаддан бошқа нарсага сарф бўлмоқ (пул, маблағ ҳақида).

Саёҳатга аталган пул уй ремонтига киришиб кетди. Сенинг ўн сўминг менга киришди.