кенг

сфт. 1. Ичи, ич ҳажми, сиғими, сатҳи катта.

Кенг уй. Кенг майдон. Кенг пайкал. Топ жойда ош егандан кенг жойда мушт еган яхши. — Мақол

Ичкари-ташқари данғиллама ҳовли. Ичкари ҳовлининг саҳни кенг. — Ойбек, Танланган асарлар

Одамлар саҳнга кенг давра қуриб ўтирдилар. — М. Исмоилий, Фарғона тонг отгунча

Тоғ этагин тутиб ётар кенг пахтазор. — Гулдаста

2. Эни, кўндаланг ўлчами катта; энли, сербар.

Кенг ёʻл. Кенг дарё. Кенг баргли ўсимликлар.

Орасидан қўқонарава бемалол юрадиган кенг, узун ишкомлар икки танобдан ортиқроқ ерни ишғол этган. — Ойбек, Танланган асарлар

3. Ўлчами мўлжалдагидан катта; катта келадиган, бемалол сиғадиган (кийим ва унинг қисмлари ҳақида).

Кенг тўн. Кенг шим. Кенг енг.

[Мингбоши] Кенг, оппоқ сурп яктагининг барларини икки ёққа ёйиб, секин-секин лапанглаб борди. — М. Исмоилий, Фарғона тонг отгунча

4. Тарқалиш, қамров доираси катта; кўп нарсани ўз ичига олган.

Кенг имкониятлар яратмоқ. Кенг истеъмол моллари. Ишнинг кўлами ниҳоятда кенг.

Муҳокама қилинган масала юзасидан кенг қарор қабул қилинди. — Газетадан

Актриса ўз қаҳрамонини кенг фикрли, салобатли, ишчан, олижаноб иффатли аёл сифатида тасвирлайди. — Газетадан

5. кўчма Меҳр-мурувватли, яхшиликни аямайдиган, кўпчиликка бирдек муносабатли.

Кенгга кенг дунё, торга тор дунё. — Мақол

Холам кўли очиқ, кенг, Овқатни улашар тенг. — Қ. Муҳаммадий.