калит

от 1. Қулфни очиш ёки беркитиш учун ишлатиладиган металл асбоб.

Уйнинг калити. Сандиқнинг калити. Эшикнинг калити.

Мамарайим афанди Тешабойдан омборларнинг калитларини олгандан кейин, у ердаги молларни яхшилаб кўздан кечириб чиқди. — М. Исмоилий, Фарғона тонг отгунча

2. Бирор механизмни бураб юргизиш, ишга тушириш учун ишлатиладиган металл асбоб.

Девор соатнинг калити. Ўйинчоқнинг калити.

Илҳомжон тезда домкрат ва калитларни олди. — Н. Аминов, Ёлғончи фаришталар

3. тех. Гайка ва болтларни бураб қаттиқлаш ёки бўшатиш учун ишлатиладиган узунчоқ дастали ёки дастасиз жағли металл асбоб.

4. мус. Беш қаторли нота чизиғининг бирортасига қўйиладиган ва шу чизиқдаги нота номи ва баландлигини билдирадиган махсус белги.

5. махс. Тест синовларида берилган тест топшириқларининг энг тўғри жавобларини акс эттирувчи жадвал; тўғри жавоблар рўйхати.

6. кўчма Бирор нарсага эришиш ёки уни тушунтириш (англаш), топиш, эгаллаш ёʻли, воситаси, имконияти.

Бахт калити. Ғалаба калити.

Мағрур овоз берар одам деган сўз! Тилсимлар калити унинг қўлида. — Т. Тўла.

Ҳаётда шундай кишилар бўладики, қалб калити уларнинг қўлида. — Ё. Шукуров, Халқ билан ҳамнафас

Ҳосилнинг калити деб аталмиш бу бойлик [минерал ўғит] қор, ёмғир остида кучини ёʻқота бошлаган. — Х. Тўхтабоев, Ўғитдан тоғлар