Ирония

kinoya, qochiriq, kesatish, piching. Badiiy asardagi inkor etish usullaridan biri boʻlib, biror shaxs yoki narsa ustidan kesatish, qochiriq vositasida yashirin kulinadi. Shuning uchun ham kinoyaning muhim belgisi soʻz yoki gapning hamma vaqt ikki maʼnoli boʻlishida, haqiqiy maʼno aytilgan soʻz yoki gapning teskari maʼnosi orqali anglashilishida namoyon boʻladi. Kinoya oʻzining taʼsir darajasiga qarab fosh etuvchi yoki shunchaki qochiriqdan iborat boʻladi. Kinoya usuli asosan hajviy, kulgili tasvirda koʻp qoʻllaniladi. Masalan, Abdulla Qahhorning «Mayiz yemagan xotin» hikoyasidagi voqea kinoya asosiga qurilgan boʻlib, domlaning oʻz xotinining yaramas ishlaridan xabarsiz holda mahalladagi halol va pokiza qizlar ustidan kulib yurishi asar oxiridagi «U kishining xotinlari mayiz yemaganlar» kinoyasi orqali fosh etilgan. Kinoya ijodkorning estetik idealini tasvirlagan voqealar, ifodalarning aks holati orqali namoyon boʻladi.