Инвектива

— invektiva. Qadimgi davrlarda keng tarqalgan keskin fosh etuvchi, qoralovchi, oʻz xarakteriga koʻra ham yozma, ham ogʻzaki ifodalanuvchi hajv turi. Invektiva turli adabiy shakllarda namoyon boʻlishi mumkin. Uning keng tarqalgan shakllaridan biri epigramma (q.)dir. Oʻzbek demokratik adabiyotining namoyandalari ijodida invektivaning ajoyib namunalarini uchratish mumkin. Bunga Muqimiy, Avaz Oʻtar oʻgʻli, Zavqiy kabi shoirlarning konkret din homiylari yoki milliy amaldor hamda mustamlakachilik homiylariga qarata yozgan hajviyalari misol boʻla oladi. Chunonchi, oʻzbek adabiyotida Zavqiyning «Ahli rasta» hajviyasi, rus adabiyotida esa M. Yu. Lermontovning «Shoirning oʻlimi» asari invektivaning goʻzal namunalaridir.