Инсценировка

1. Drama shaklida yozilmagan biror adabiy asarni sahnada qoʻyishga moslab qayta ishlash; chunonchi, bunday asarni radioda, televideniye yoki teatrda qoʻyilishiga qarab, radioinssenirovka, teleinssenirovka deb yuritiladi. Inssenirovka adabiy asarning oʻz muallifi tomonidan ham, boshqa shaxslar tomonidan ham amalga oshirilishi mumkin. Adabiy asar inssenirovka qilinganda, baʼzan uning syujetiga juzʼiy oʻzgartishlar, ayrim qoʻshimcha motivlar kiritilishi ham mumkin. Inssenirovka XIX—XX asrlarda ayniqsa keng taraqqiy etdi. Bunga F. Dostoyevskiyning «Aka-uka Karamazovlar», L. Tolstoyning «Tirilish», «Anna Karenina», D. Furmanovning «Chapayev» va «Isyon», shuningdek, M. Sholoxov, L. Leonov. A. Tvardovskiy, Oybek, H. Olimjon, A. Qahhor, Gʻ. Gʻulom kabi ijodkorlarning koʻplab asarlari asosida yaratilgan inssenirovkalar misol boʻla oladi.

2. Tarixiy voqealarning epizodlari asosida 1920 yillarda yuzaga kelgan va keng tarqalgan ommaviy-tashviqiy teatr shakllaridan biri. Bunday inssenirovkalar garchi tarixiy voqealar asosida yuzaga kelgan boʻlsa ham, ularda mubolagʻa, shartlilik va romantik ruh mavjud boʻlgan.