ilashmoq

fl. 1. Ilinmoq, yopishmoq (xas-choʻp, loy va shu kabilar haqida).

Uning etagiga paxta ilashibdi. Yaxshiga ipak ilashur, yomonga — tikan. — Maqol

Shunda qoʻliga shilimshiq loy ilashganini sezdi. — P. Qodirov, Yulduzli tunlar

Bir quti sigaretga ilashib, choʻntagimdan Moskvichning kaliti ham chiqdi. — S. Siyoyev, Yorugʻlik

U etakka ilashib qolgan paxtalarni qoqayotganda, boshidagi chopon birdan sirgʻalib tushib ketdi. — M. Ismoiliy, Fargʻona tong otguncha.

2. koʻchma Yopishmoq.

Men sudxoʻrman, bu oʻgʻri, Oʻroqdan ham biz toʻgʻri. Bizga ilashganlarning Oʻtdek yonadi goʻri. — Hamza

Yoshlikdan ilashgan illat hali koʻp munkitadi. — Sh. Gʻulomov, Boʻz yer uygʻondi

3. salb. Ketidan yurmoq; ergashmoq.

Unsin indamadi, orqasidan ilashib koʻchaga qadar chiqqan Xayrinisoning soʻzlarini ham eshitgisi kelmasdi. — Oybek, Tanlangan asarlar

4. Ketidan qolmay (biron maqsadda) yurmoq; aylanishmoq, ilakishmoq.

— Pulimni oldirib qoʻydim. Yonimda mana shu yigit ilashib yurgan edi, gumonim shundan, — dedi Sulton — Gʻ. Gʻulom, Shum bola

Jiyaningizga bir qizmi, juvonmi ilashib yurgan emish, shu rostmi? S. — Nurov, Narvon

5. kam qoʻll. Birgalashib, ulanib ketmoq; qovushmoq, qoʻshilmoq.

Men mehmonlar bilan sirdosh ogʻaynilardek ilashib ketdim. — I. Oʻktamov, Hikoyalar

Deyarli hamma bilan ilashib ketdi. — J. Abdullaxonov, Toʻfon

Gap-soʻz bir-biriga ilashmadi: chol oldida xotinlar haqida soʻzlanilmadi. — Oybek, Tanlangan asarlar

цепляться, зацепляться

v 1. catch (on)

2. gain a toehold (on)

1. iliniw, jabısıw

2. awıs. izinen júriw

3. awıs. aylanshıqlaw

4. qosılıw, aralasıw

sich anhaken, hängenbleiben vi, s