иккинчи

сон 1. Тартиб сирасида 2 рақами билан белгиланган; 2 номерли.

Иккинчи жилд. Иккинчи уй. Иккинчи қатор.

Жувон узоқ адирнинг этагида қорайиб турган қишлоқни кўрсатди: — Иккинчи МЦ ҳу ўша ерда. — А. Қаҳҳор, Қўшчинор чироқлари

2. Маълум тартибдаги предмет, воқеа-ҳодиса ва шу кабилар қаторида энг олдингидан кейинги ўринда турган, биринчидан кейинги.

Иккинчи синф. Ўтган асрнинг иккинчи ярмида.

Далага биринчи куни 52, иккинчи куни 79 одам чиқди. — А. Қаҳҳор, Қўшчинор чироқлари

3. Айни бир нарсанинг тилга олинганидан бошқаси, кейингиси.

Мурод бир туфлисининг учини иккинчисининг товони билан босиб, чаққонлик билан оёқ кийимини олди-да, уйга кирди. — Т. Ашуров, Оқ от

Улар бир-бирлари билан ўчакишгандай, хурракни даража-бадаража оширишга тиришади: бирисиники авжга минганда, иккинчиси бошлайди. — Ойбек, Танланган асарлар

4. Бошқа марта, қайта.

Бас, уяциз махлуқ! Ким уни заҳарлайди? Бу гапни ман иккинчи эшитмай. — Ойбек, Танланган асарлар