ГИДРОГЕОЛОГИЧЕСКИЕ ПОКАЗАТЕЛИ НАЛИЧИЯ ЛОВУШЕК НЕФТИ И ГАЗА

нефт ва газларни излашда ва нефт-газлилик истиқболларини баҳолашда зарур бўлган гидрогеологик кўрсаткичлар. Одатда, нефт-газ уюмлари сувбосимли нефт-газли мажмуаларнинг бўшалиши қийин бўлган участкаларида ҳосил бўлади. Шу сабабли, бундай боғлиқлик нефт-газ тутқичларининг гидрогеологик кўрсаткичлари асосларини ташкил этади. Бундай кўрсаткичларга: а) гидродинамик ва умумгидрогеологик; б) гидрокимёвий белгилар киради. Гидродинамик ва умумгидрогеологик кўрсаткичлар. Сувбосимли қатламларда пезометрик минимумларнинг бўлиши юқорида жойлашган қатламларга сувларнинг оқиб ўтишини, яъни ушбу қатламда бўшалиш ўчоқлари мавжудлигини, пезометрик максимумлар эса ушбу қатламни пастда жойлашган қатлардан таъминланаётганини, яъни пастки қатламда бўшалиш ўчоқлари бўлишини билдиради. Гидрокимёвий кўрсаткичлар тутқичлар мавжудлигидан билвосита дарак беради, шу сабабли, амалиётда кенг қўлланилади. Айниқса, юқорида жойлашган горизонтлар — грунт сувлари ва артезиан сувлари горизонтларидаги гидрокимёвий аномалиялар муҳим аҳамият касб этади. Кўпинча, гидрокимёвий аномалиялар юқорида жойлашган сувлар таркибининг пастдаги сувлар таркибига яқинлигини билдиради. Гидрокимёвий кесим характери бир меъёрда бўлса, аномалия сувнинг умумий минералланишида, хлор миқдорини ошишида ва сулфатлиликни камайишида кўринади. Гидрокимёвий аномалия одатда артезиан горизонт сувларида намоён бўлади, грунт ва ер юзаси сувларида эса турли гиперген омиллар таъсирида ниқобланиб қолади., Нефт ва газ тутқичлари мавжудлигини билдирувчи гидрогеологик кўрсаткичлар