ГИДРОГЕОЛОГИЧЕСКИЕ ПОКАЗАТЕЛИ НАЛИЧИЯ ЛОВУШЕК НЕФТИ И ГАЗА

neft va gazlarni izlashda va neft-gazlilik istiqbollarini baholashda zarur boʻlgan gidrogeologik koʻrsatkichlar. Odatda, neft-gaz uyumlari suvbosimli neft-gazli majmualarning boʻshalishi qiyin boʻlgan uchastkalarida hosil boʻladi. Shu sababli, bunday bogʻliqlik neft-gaz tutqichlarining gidrogeologik koʻrsatkichlari asoslarini tashkil etadi. Bunday koʻrsatkichlarga: a) gidrodinamik va umumgidrogeologik; b) gidrokimyoviy belgilar kiradi. Gidrodinamik va umumgidrogeologik koʻrsatkichlar. Suvbosimli qatlamlarda pezometrik minimumlarning boʻlishi yuqorida joylashgan qatlamlarga suvlarning oqib oʻtishini, yaʼni ushbu qatlamda boʻshalish oʻchoqlari mavjudligini, pezometrik maksimumlar esa ushbu qatlamni pastda joylashgan qatlardan taʼminlanayotganini, yaʼni pastki qatlamda boʻshalish oʻchoqlari boʻlishini bildiradi. Gidrokimyoviy koʻrsatkichlar tutqichlar mavjudligidan bilvosita darak beradi, shu sababli, amaliyotda keng qoʻllaniladi. Ayniqsa, yuqorida joylashgan gorizontlar — grunt suvlari va artezian suvlari gorizontlaridagi gidrokimyoviy anomaliyalar muhim ahamiyat kasb etadi. Koʻpincha, gidrokimyoviy anomaliyalar yuqorida joylashgan suvlar tarkibining pastdagi suvlar tarkibiga yaqinligini bildiradi. Gidrokimyoviy kesim xarakteri bir meʼyorda boʻlsa, anomaliya suvning umumiy minerallanishida, xlor miqdorini oshishida va sulfatlilikni kamayishida koʻrinadi. Gidrokimyoviy anomaliya odatda artezian gorizont suvlarida namoyon boʻladi, grunt va yer yuzasi suvlarida esa turli gipergen omillar taʼsirida niqoblanib qoladi., Neft va gaz tutqichlari mavjudligini bildiruvchi gidrogeologik koʻrsatkichlar