Германизмы

germanizmlar. Nemis tilidan oʻtgan soʻz, ifoda yoki iboralar. Rus tilidagi germanizmlar asosan ikki qatlamni tashkil etadi. Birinchi qatlam XIII asrga taalluqli boʻlib, u Germaniya bilan harbiy toʻqnashuvlar hamda savdo aloqalari natijasida yuzaga kelgan. Ikkinchi qatlam esa Pyotr I davriga toʻgʻri keladi. Germanizmlar asosan quyidagi sohalarga aloqador soʻzlardan iborat: texnikaga (master, kleyster, verstak), savdo-sotiqqa (veksel, kassir, buxgalter), harbiy sohaga (gauptvaxta, ofitser, feldmarshal, shtab), madaniyat va savdoga (landshaft, molbert, fleyta), maishiy hayotga (galstuk, fartuk, kuxnya, bifshteks) oid soʻzlar va h. k. Germanizmlarning aksariyati rus tili orqali boshqa tillarga, jumladan, oʻzbek tiliga ham oʻtdi va hozir ulardan koʻpi kundalik hayotimizda qoʻllanilmoqda. Masalan: galstuk, fartuk, shtab, ofitser kabilar.