ГАММА-ГАММА КАРОТАЖ (ГГК)

Gamma-gamma karotaj (GGK) — radioaktiv karotaj turi. GGKda burgʻu qudugʻidagi togʻ jinslarini gamma nurlar bilan nurlantirib, ular atomlaridan qaytgan gamma-nurlar oʻlchanadi. Togʻ jinslarni nurlantirish uchun radioaktivli seziy (gohida kobalt yoki surma) qoʻllaniladi. Geofizik apparatning RKS—1, RGP—2 va SGP—2 turlari keng ishlatiladi. GGK nurlantiruvchi gamma-nurlarning energiyasiga koʻra bir necha turlarga boʻlinadi. Agar togʻ jinslarini 0,5 dan 2,0 MeV energiyali gamma-nurlar bilan nurlantirsa, ularda Kompton sochilish jarayonlari sodir boʻladi. Sunʼiy gamma sochilish yordamida togʻ jinslarining zichligi aniqlanadi. Togʻ jinslarining zichligi ularning gʻovaklilik koeffitsiyenti bilan uzviy bogʻliqdir, yaʼni: $K_{\text{p}} = (\sigma_{\text{sk}} - \sigma_{\text{p}}) / (\sigma_{\text{sk}} - \sigma_{\text{f}})$, bunda: $\sigma_{\text{sk}}$, $\sigma_{\text{p}}$, $\sigma_{\text{f}}$ — togʻ jinsining mineral qismining skeleti, qatlamning hajmiy va flyuidga toʻyingan zichliklari. Togʻ jinslarini 0,1—0,3 MeV energiyali gamma-nurlar yordamida oʻrganish selektiv GGKning asosi hisoblanadi (q. Karotaj selektivniy). Energiyasi 0,1 MeV dan kichik gamma-nurlar bilan togʻ jinslari nurlantirilsa rentgen nurlari sochiladi. GGKning bu turi rentgen-radiometrik karotaj deb yuritiladi (q. Karotaj rentgeno-radiometricheskiy).