эгалламоқ

фл. 1. Эга бўлмоқ, ўзиники қилиб олмоқ.

Уйдаги асл буюмларни ўзи эгаллаб олади, биз унда нима қиламиз? — Ойбек, Танланган асарлар

Ҳа, муғамбир, менга ёмон кўрсатиб, ўзинг эгаллаб олмоқчисан шекилли. — Гулдаста

Иш битиб, эшак лойдан ўтгандан кейин зўравонлар чиқиб, ерларни эгаллаб оладиган бўлса, бунинг оқибати ёмон бўлади. — М. Исмоилий, Фарғона тонг отгунча.

2. Бирор жой, сатҳ ва шу кабиларни банд этмоқ, унда жойлашмоқ, ўрнашмоқ.

Минбарни юқори курс студентлари эгаллади. — Ж. Абдуллахонов, Орият

Хон бошлиқ аркони давлат, дин пешволари тахтиравонни эгаллашди. — С. Сиёев, Ёруғлик.

3. Бирор сатҳ, юзани қопламоқ.

Бутун айвоннинг бўй-энини эгаллайдиган гилам устидаги пастак стол одатдагидек безатиб қўйилган — Ў.Ҳошимов, Қалбингга қулоқ сол

Гўё хотини ўлмагандай, қоп-қора қалин сочлари бутун ёстиқни эгаллаганча ҳамон ёнида ётгандай туюлди Камолиддинга. — Ў. Усмонов, Сирли соҳил

Рўпарадаги икки қаватли уйнинг сояси ҳовлининг ярмини эгаллаб олибди. — С. Сиёев, Ёруғлик

4. Қамрамоқ, қамраб олмоқ, чулғамоқ, қоплаб олмоқ.

Ёдгорнинг бутун вужудини ҳорғин, мудроқ бир кайфият эгаллади. — Ў. Ҳошимов, Қалбингга қулоқ сол

Саодатхоннинг юзидаги жиддийлик ўрнини ғалати, кинояга ўхшаш табассум эгаллади. — С. Зуннунова, Янги директор

Кечаги изғирин шамол ўрнини тўсатдан илиқ майин шабада эгаллади — Ў. Ҳошимов, Нур борки, соя бор

5. Забт этмоқ, ишғол қилмоқ.

Взводга жанг билан муҳим тепаликни эгаллаш вазифаси топширилди. — Т. Рустамов, Мангу жасорат

Ҳамма юксак маррани тезроқ эгаллаш иштиёқида меҳнат қилмоқда. — Газетадан

6. кўчма Билиб, ўрганиб олмоқ; ўзлаштирмоқ.

Бу йиллар мобайнида у пахтачиликнинг сир-асрорларини пухта эгаллади. — Газетадан

Дарс бериш, лексия пайтида аудиторияга жон киритиб юбориш санъатини эгаллади. — Ж. Абдуллахонов, Орият

Болалар тўгаракларда иштирок этиб, дам олиш билан бирга, касб-ҳунар эгалламоқдалар. — Газетадан

7. Бирон ўрин, даража ва шу кабиларни қўлга киритмоқ.

Мусобақада фигурачиларимиз бешта совринли ўринни эгаллашди. — Газетадан

8. Бирон даража, мавқе, ўринда бўлмоқ, турмоқ.

Маънавий камолот босқичлари ичида хушмуомалалик, ширинсуханлик асосий ўринни эгаллайди. — Саодат

Ўтмишдаги санъаткорлар ичида қизиқчилар алоҳида ўрин эгаллаб келганлар. — Т. Обидов, Юсуфжон қизиқ