don
донdon I
ot 1. Boshoqli va dukkakli oʻsimliklar mahsulining bir donasi.
Bugʻdoy doni. Makkajoʻxori doni. Dehqon ishlab don sochar, El-yurtiga non sochar. — Maqol
Arpaning doni boʻlguncha, Bugʻdoyning somoni boʻl. — Maqol
— Bir qumursqa bir dona donni tortsa, ikkinchi qumursqa orqadan itarib, unga yordam beradi-da, — dedi bir dehqon. — S. Ayniy, Qullar
2. Shunday mahsul majmui, yigʻindisi; gʻalla.
Birida ulov boʻlsa, ekish uchun doni yoʻq, doni borida ulov, yer yoʻq. — N. Safarov, Olovli izlar
Endi mehnat kuniga ham oz-moz don tegsa kerak. — O. Yoqubov, Er boshiga ish tushsa
Boshida otasi, uyida qopda doni boʻlsa, bular shu yerda oʻtirarmidi. — T. Ashurov, Oq, ot
3. Parrandalarga beriladigan shunday ovqat, ozuqa; (sochiladigan) don-dun.
Bir tovuqqa ham suv kerak, ham don. — Qanotli soʻzlar
Bolali ona nonga toʻymas, Bolali gʻoz — donga. — Maqol
Ey, doʻstim, hozir-chi, tuxum qilmaydigan tovuqqa hech kim don bermaydi. — Shukrullo, Saylanma
Onasi toʻr ortidagi tovuqlarga don sochardi. — Oʻ. Hoshimov, Qalbingga quloq sol.
- Don olishmoq Biror kimsa bilan yaqinlik qilmoq, intim munosabatda boʻlmoq; oʻynash boʻlmoq. Oyim tirikliklarida ham dadam Zumrad kampir bilan don olishib yurardilar. — S. Ahmad, Yulduzlar— Bir-biri bilan don olishib qolgan boʻlsa siz bilan biz quda boʻlishdan boshqa ilojimiz yoʻq, — dedi Salim bobo. S. Ahmad, Choʻl oqshomlari.
- Na don, na somon Hech narsaga yaramaydigan narsa yoki kimsa haqida. Oʻzi, baʼzi retsenziyalar boʻladi, oʻqisang — na don, na somon. — S. Abduqahhor, Sanamay sakkiz dema
don II
ot Ispaniyada va ispan tilida soʻzlashuvchi boshqa mamlakatlarda: erkak ismi oldidan qoʻyib, unga hurmat bilan murojaat qilishda qoʻllanadigan soʻz; Italiyada: ruhoniylar va dvoryanlarning faxriy unvoni.