dagʻal

sft. 1. Koʻrinishi, tuzilishi beoʻxshov; qoʻpol.

Dagʻal barmoqlar.

Men bekaning dagʻal qoʻllarini oʻpdim. — Yoshlik

Nazarga xotinning barmoqlari serpay, dagʻal tuyuldi. — E. Usmonov, Yolqin

2. Tabiiy holda qattiq; mayin, silliq emas.

Dagʻal soch. Dagʻal jun.

Mulla Ikrom baland boʻyli, dagʻal soqol bir kishi edi. Oybek, — Tanlangan asarlar

Har yilgidan koʻra koʻproq silos, senaj va dagʻal xashak bostirildi. — Gazetadan

Uning peshonasi ustida hurpaygan timqora, dagʻal sochlari lampa shishasiga qariyb tegib turardi. — Oybek, Oltin vodiydan shabadalar.

3. Qoʻpol ishlangan, joʻn.

Dagʻal movut. Dagʻal qogʻoz.

Dagʻal saxtiyondan etik kiygan oyoqlarini kerib pichan uyumlarini aravaga ortardi. — S. Anorboyev, Oqsoy

4. Hazm boʻlishi qiyin, badhazm.

Dagʻal ovqat.

Mol goʻshtida esa birlashma toʻqima koʻp va dagʻal boʻlgani uchun qattiq va hazm boʻlishi qiyin. — N. Ismoilov, Kasallarni parvarish qilish

5. Kishiga qattiq tegadigan, qattiq botadigan; sovuq, qoʻpol.

Dagʻal gap. Dagʻal muomala. Dagʻal odam,

Raisning dagʻal gapirishi Kozimga yoqmadi. — E. Usmonov, Yolqin

Muhammadi dagʻal gapirib, uning taʼbini xira qildi. — Mushtum

U dagʻal va sovuq tovush bilan oʻqidi. — M. Ismoiliy, Fargʻona tong otguncha

[Davronovning] Muomalasi dagʻal, ogʻzi koski boʻlib, odamlarni oyoq uchida koʻrsatardi. — H. Nazir, Koʻkterak shabadasi

Kampir dagʻal javob berdi. — X. Toʻxtaboyev, Shirin qovunlar mamlakati