БОЙЛЕР (НАГРЕВАТЕЛЬ ВОДЫ)

Boyler (suv isitgich) — suyuqlikni (suv, suyuq moddalar, suvli eritmalar va h.k.) issiq suv yoki bugʻ bilan isituvchi trubkali issiqlik almashtirgich. Bugʻ bilan isitilganda trubkalardan isitiladigan suyuqlik asosan, suv oʻtadi, trubkalararo boʻshliqdan esa bugʻ yuboriladi. Bugʻ oʻzining issiqligini trubka orqali suyuqlikka berib soviydi, soʻngra kondensatsiyalanib, yaʼni suyuqlikka aylanib, B.ning ostki qismiga tushadi. Yigʻilgan bugʻ kondensati qayta isitish uchun qozonga yuboriladi yoki boshqa maqsadlar uchun ishlatiladi. B.ning issiqlik tarmoqlariga yuboriladigan suv turbinalardan olinadigan bugʻ bilan isitiladi. Neft va gazni qayta ishlash korxonalarida B. asosan xom ashyoni (neft, gaz kondensati va sh.k.) toʻgʻridan toʻgʻri haydash, rektifikatsiya, gazni komponent-larga ajratish, desorbsiya minoralarida (kolonnalarida) qizdirib turish uchun ishlatiladi.