бисмиллоҳ

от 1. Қуръон сураларининг ва умуман эски китоб, ҳужжат, хат ва шу кабиларнинг “Аллоҳнинг номи билан“ маъносидаги бошланиш ибораси (бисмиллоҳи раҳмонир раҳийм) таркибидаги сўз.

[Асад қори:] Бошидан ўқиётибман, тақсир. — Қози Асад қорига жаҳл билан ўқрайди: — Бисмиллоси қани? — М. Исмоилий, Фарғона тонг отгунча

Уни шай-тон, ҳа-ҳа, заводдаги мастеровойлар билан бисмиллоси ёʻқ китоблар айнитди! — К. Яшин, Ҳамза

Бисмилло, деб Авазхон Шивирлади Ғиротга. — Нурали

2. с. т. Бирор ишга киришишда, хусусан овқат ейишни бошлашда айтиладиган сўз.

Мирзакаримбойнинг хотини, ҳарсиллаб-гурсуллаб, нарвончанинг ҳар поғонасига қадам қўйганда, бисмиллони такрорлаб, аравага ўтирди. — Ойбек, Танланган асарлар

Огзидаги носини тупуриб, бисмилло деганича, шимининг почасини шимариб, кетмон билан ўрага тушди. — С. Аҳмад, Сайланма

3. кўчма с.т. Бирор ишнинг аввали, бошланиши, муқаддимаси, дебочаси.

[Мирзараим Мастурага:] Пул ҳали сомон, бўлиб қолади. Бу ҳали бисмиллоси-да. — Ҳамза, Яллачилар иши

Бу гал зиёфатнинг бисмиллоси сарёғ паловдан бошланяпти. — Шарқ юлдузи

Уни [шеъримни] ранжитмаслик учун ушбу китобимнинг бисмиллосини ҳам шеър билан бошладим. — Шукрулло, Жавоҳирлар сандиғи