базм
bazmбазм
от 1. Мусиқа ва ўйинлар билан ўтказиладиган зиёфат, тўй, ўтириш; ўйин-кулги кечаси.
Қий-чув билан ўтган наҳорликдан сўнг ҳовлида яна базм бошланди. — Ойбек, Танланган асарлар
Дутор ёнига чилдирманинг чертмаги келиб қўшилгандан кейин, базм тағин ҳам жонланди. — А. Қодирий, Ўтган кунлар
Табиб, сиз карнай-сурнай чалди-ринг, ноғоралар жарангласин, базм қурамиз. — Ёшлик
2. кўчма Табиатдаги жонли ва жонсиз нарсаларнинг кишига завқ берувчи хатти-ҳаракатларини ифодалайди.
Чумчуқлар дарахт шохларида ёздаги каби базм қуришган. — А. Обиджон, Аканг қарағай Гулмат
Кечаси ўрдаклар базми бошланади. — С. Аҳмад, Уфқ
Гулдурос, даҳшатли гулдурослар; чақмоқлар, чақинлар. Осмонларда чақмоқлар базми. — У. Қўчқоров, Ҳаяжонга кўмилган дунё
Олисдаги зовурда ёлғиз бақа аҳён-аҳёнда вақиллаб, шерикларини базмга чорлайди. — Гулдаста
Хилма-хил ёввойи гуллар теварагида капалаклар базм қуради, асашрилар ғувуллайди. — Ж. Абдуллахонов, Орият
- Базми жамшид Катта базм, дабдабали, шоҳона базм. [Ҳусайн:] Ўҳў, базми жамшид қизиган экан-да, кулгиларингиз осмони фалакка кўтарилмоқда. — Уйғун ва И. Султон, Алишер НавоийКатта ҳовлининг тўридаги шийпонда базми жамшид авжида эди. — О. Ёқубов, Диёнат
- Базм қурмоқ Ўйин-кулгили, кўнгилочар йиғилиш, ўтириш уюштирмоқ.
- Қизлар базми Унинг [Кумушнинг] вужуди қизлар базми ичида бўлса ҳам, хаёли аллақаёқларда учиб юргандек, кўзлари ўйнагувчи қизларда бўлса ҳам, ҳақиқатда бошқа бир нарсани кўргандек. — А. Қодирий, Ўтган кунлар