АЦЕТОН (ДИМЕТИЛКЕТОН)

Atseton (dimetilketon) — oddiy keton. Rangsiz alangalanadigan suyuqlik. Kimyoviy formulasi CH₃COCH₃, 95,35°S da eriydi, 760 mm simob ustunida qaynash temperaturasi 56, 24°S, 20°S temperaturada zichligi 790,8 kg/m³, toʻyingan bugʻlarining bosimi 181,72 mm simob ustuniga teng. 15°S temperaturada qovushqoqligi 0,3371 sP (Pa · s), yopiq tigelda —18,8°S da chaqnaydi. Suv, spirt, efirlar bilan ixtiyoriy nisbatda aralashadi, xloroformda eriydi, zararli, havodagi ruxsat etilgan chegara miqdori 200 mg/m³. Havo bilan aralashganda hajmining 2,2—13% portlashga xavfli. Yogʻ, qatron, lak va shu kabi mahsulotlarni yaxshi eritadi. A. propilen, atsetilen, sirka kislotasi va etil spirtidan katalizatorlar ishtirokida, shuningdek, kraxmalni achitib olinadi. Mas., propilenni katalizator bilan gidratlab izopropanol olinadi, soʻngra uni degidratlab A. olinadi. A. lak, portlovchi va organik moddalar (metilmetakrilat, metilizobutilketon, metakril kislota va h.k.) olishda, sintetik ipak ishlab chiqarishda erituvchi modda hisoblanadi.