сфт. 1. Жисмонан қуввати кам, беқувват, нимжон, кучсиз.
Заиф бола,
Жисмонан заиф, кексароқ ёки совуққа анча таъсирчан кишилар, яхшиси, кечқурун ётишдан олдин оёққа совуқ ванна қилишлари керак. — Фан ва тур-муш
Гулчеҳра Султоннинг титроқ босган заиф қўлларини қайноқ ёш томчилари билан ювилаётган юзига босди — М. Хайруллаев, Тилла маржон
2. Тембр жиҳатдан баланд, кучли бўлмаган; кучсиз, паст.
Ғуломқодирнинг овози жуда заиф чиқди. — Шарқ юлдузи
Аёл кишининг заиф инграган овозини эшитиб, ўзига келди-да, отилиб уйга кирди. — Х. Аҳророва, Орифнинг давлати
— Қўрқманг, мен — деди Ғуломжон, куз япроғидай титраб турган заиф товуш билан. — М. Исмоилий, Фарғона тонг отгунча
3. Иқтисодий ёки ҳарбий жиҳатдан ночор, камбағал.
Сиз кўраётган гигант ёнида иқтисодий заиф хўжаликлар тиралиб ёца, бу номутаносибликни биздан кейинги авлодлар кечирармикан? — А. Мухтор, Бўронларда бордек ҳаловат
4. Унчалик кўп бўлмаган, жуда оз; хира.
Заиф шуъла.
Сариқ, мойли қоғоздан зўрға ўтган заиф нур тўқувчи аёлларнинг танда устидаги қўлларигагина тушади. — А. Мухтор, Опа-сингиллар
5. Маҳорат нуқтайи назаридан кучсиз, бўш; пухта ишланмаган.
Биз Абдулла Қодирийнинг ижобий фазилатлари ҳақида фикр юритар эканмиз, ундаги айрим заиф томонларни ҳам кўрсатиб ўтишимиз зарур. — Газетадан
Даҳо улуғ шоирнинг заиф жойини билиб олди. — Т. Мурод, Қўшиқ
- Ақли заиф Эси паст, ақли кам; овсар, жинни. Анварнинг ўзи сал ақли заиф экан, восвосга тушиб қолган; акалари уни хафа қилган. — Газетадан
- Мизожи заиф Эркаклиги суст. — Мендан-а, хотинингиздан уяласизми? —Уялмайманми? — Уялманг. — Уялмасам мизожим заиф. — А. Қодирий, Ўтган кунлар