ot 1. Biror ish yoki mehnat bilan shugʻullanish; biror ishni bajarish; ish, mehnat.
Bir kun eshon meni chaqirib: — Oʻgʻlim, — dedi, — mana endi bizga ancha xizmating singdi. — Gʻ. Gʻulom, Shum bola
Yurt, hukumat aslo bu xizmatlaringni unutmaydi. — S. Ahmad, Ufq
— Agar mening bu xizmatim xon janobining marhamatiga loyiq koʻrilar ekan, — dedi hoji, — menga eng manzur boʻlgan mukofot oʻgʻlimning ozod qili-nishidir. — A. Qodiriy, Oʻtgan kunlar
2. Birovga yordam koʻrsatish; xolisona qilingan ish; yordam; yaxshilik.
Bu xizmatingni sira unutmayman. Elga xizmat — oliy himmat. — Maqol
Elga xizmat qilib, bolam, duo ol. — Malikayi ayyor
To oʻlguncha, ota, qilay xizmating, Qilgan xizmatlarim — sening izzating. — Malikayi ayyor
3. Biror tashkilot, muassasa yoki korxonada bajariladigan ish, vazifa; lavozim; shunday joyda ishlash.
Birinchi noyabrda boʻlsa kerak, Mushtum xizmatiga kirishganman. — A. Qodiriy, Kichik asarlar
Siz, ogʻaynilar, ilgari xon yonida qandoq xizmatda boʻlgan boʻlsalaringiz, endi ham oʻsha vazifada qolaberasizlar. — A. Qodiriy, Oʻtgan kunlar
U [Ahror xalfa Fuzayilxonov] shu yerdagi xizmatga kirib, keyinchalik sekin-asta birinchi sinf oʻqituvchisi boʻlib oldi. — Mushtum
4. Ish, topshiriq, vazifa.
[Homid:] Kishining xizmatidan qochgan odam emasman. — A. Qodiriy, Oʻtgan kunlar
Sizga ogʻir kelmasa, bir xizmat topshirmoqchiman, usta! A. — Qodiriy, Oʻtgan kunlar
5. Soʻroq ohangi bilan aytilib, Menda nima ishingiz bor? degan maʼnoni bildiradi.
— Xoʻsh, oʻrtoq Doʻsmatov, xizmat? — dedi Davlatyor. — P. Tursun, Oʻqituvchi
— Xizmat? — dedi u [Akram] yumshoq kresloning suyanchigʻiga oʻzini tashlab, Nigoraga tikildi. — S. Anorboyev, Oqsoy
6. s. t. Armiya safida boʻlish, harbiy majburiyatni oʻtash.
Xizmatga chaqirilmoq.
[Ota-onalar] Bundan bir yoki ikki yil ilgari askarlikka uzatgan va xizmatini tugatish oldida urushga toʻgʻri kelib, hozir jang qilayotgan bolalarni esladilar. — I. Rahim, Chin muhabbat
7. Armiya tarkibidagi ayrim ixtisoslashgan sohalar yoki tarmoqlar.
Aloqa xizmati. Tibbiyot xizmati. Razvedka xizmati.
- Xizmat qilmoq 1. Ish, yumush qilmoq. Bu esa yelib-yugurib xizmat qilib yurgan Obidovning koʻngliga gʻulgʻula oldi. — Gazetadan;U institutda xizmat qiladi;Boburnomadagi maʼlumotlar hozirgi zamon fani uchun ham xizmat qiladi. — Fan va turmush
- Xizmat haqi Biror ish yoki topshiriqni bajargani uchun beriladigan haq. Mana, Mutal polvon, hozircha oz boʻlsa ham, shuni olib turasiz, ammo xizmat haqingiz oʻz yoʻliga boʻladir. — A. Qodiriy, Oʻtgan kunlar
- Xizmatingizga tayyorman Nima ish buyursangiz, bajaraveraman, buyrugʻingizga muntazirman. [Shofyor yigit:] Xizmatingizga doim tayyormiz. — S. Anorboyev, Oqsoy
- Xizmat koʻrsatgan Mehnati eʼtirof etilgan kishilarga beriladigan faxriy unvonlar tarkibida ishlatiladi. Xizmat koʻrsatgan oʻqituvchi. Xizmat koʻrsatgan fan arbobi. Oʻzbekiston Respublikasida xizmat koʻrsatgan artist.
- Xizmat koʻrsatmoq Kishilar ehtiyojini, talabini qondirish bilan bogʻliq biror ish qilmoq. Madaniy xizmat koʻrsatmoq.
- Xizmatda (yoki xizmatingizda) boʻlaylik Biror kimsani mehmondorchilikka taklif qilganda, iltifot yuzasidan aytiladigan ibora. Mulla Gʻulom, bugun xizmatda boʻlaylik, qoʻl boʻshadi deguncha toʻgʻri kelaverasiz. — M. Ismoiliy, Fargʻona tong otguncha