sft. 1. Tez ucha oladigan, tezuchar.
Vaqt bamisoli bir uchqur qush ekan. — J. Abdullaxonov, Yoʻl
2. Koʻchma Tez chopa oladigan; chopqir.
Qamchi yeb oʻrganmagan uchqur bedov oldinga oʻqday otilib, egasini balo-qazodan olib chiqib ketdi. — P. Qodirov, Yulduzli tunlar
3. koʻchma Juda tez (uchish kabi) harakatlanuvchi (mavhum narsalar haqida).
Uchqur zamon bilan qalqib, chayqalib, Charx urib boraman girdoblar aro. — E. Vohidov, Charogʻbon
[Oybekning] Qaqroq dudoqlarida aytilmagan soʻz uchqur xayolida ulkan kitob qolib ketdi. — Mirtemir, Yoʻqlash
Yillar uchqur, oʻtaveradi, Xotiralar tobora ogʻir. — X. Davron