Қидирув

фл. 1. Чарчоқ, эзилиш ва шу кабилардан холи бўлиб, бардам, тетик ҳолатли бўлмоқ.

Ухла, ухла, сафаринг узоқ, тиниқиб ол, ўғлим. — Ойбек, Болалик

Ана шундан кейин болаларнинг ақлларигина эмас, танлари ҳам секин-секин тиниқиб борди. М. Исмоилий, Фарғона тонг отгунча.

2. Тиниқлашмоқ (тўғри ва кўчма маънода).

Ўша-ўша Латофат. Сира ўзгармабди. Тиниқиб, хиёл тўлишибди. — С. Кароматов, Ҳижрон

Франсия, Англия хотинлари ўн биргача ухлашади, шунда юзлари яхши чиройли бўлади, тиниқади — Мирмуҳсин, Умид

3. кам қўлл. айн. Тинмоқ, тинимоқ.

Ариқчаларнинг биттасида оппоқ сут, биттасида тиниққан сув биттасида шароб оқмоқда. — Фитрат, Қиёмат

1. Лойқа ва шу кабилардан холи, ти-ниган ҳолатли

Чўққилардан оқиб тушган бу сойлар шишадек тиниқ — Мирмуҳсин, Ҳам-заобод

Ариқчаларда кеч кузнинг тиниқ суви лимиллаб оқади — Н. Аминов, Суварак

2. Гард-ғубор, хиралик ва шу кабилардан холи, равшан кўринишли

Осмон ҳар вақтдагидек булутлардан холи, беғубор, тиниқ, кўм-кўк — М. Исмоилий, Фарғона тонг отгунча

Радиодан дутор садоси таралар, сеҳргар куй Темир-жоннинг қалбига кириб борар, тиниқ юзида ёқимли, мулойим жозиба.. уйғотарди — Ж. Абдуллахонов, Орият

Кўзларининг қораси ниҳоятда тиниқ ва ўтли — П. Қодиров, Уч илдиз

3. Хиратик, қўполликдан холи; жарангдор (товуш, овоз ҳақида)

Адолат дуторини қўлга олди. Бир нафасдан кейин унинг қўнғироқдек тиниқ овози янгради. С — Зуннунова, Гулхан

Тоғбағрида ўйноқлабюгурган жилғаларни эслатувчи тиниқ, жозибадор садо хонани тўлдирди — Ж. Абдуллахонов, Орият

4. кўчма Аниқ ифодали; равшан. . . Унинг хотираси ҳайратда қоларли даражада бой ва тинш эди. Газетадан

Сўз-фикри тиниқ зиёли бўлганингиз учун ҳам биз чекаётган айрилиқ ситамини сезяпсиз — Мирмуҳсин, Меъмор

Жаҳонда ақли тиниқ шинаванда йигитнинг битаси сен-у, биттаси мен — Ж. Абдуллахонов, Тожи билан Ҳожи

от Тиниқ ҳолат.

Осмон шу қадар беғубор, шу қадар кўм-кўк кўринадики, гўё ҳеч қаерда бунақа тиниқлик бўлиши мумкин эмасдек. — Ж. Абдуллахонов, Тўфон

Бу сувлар ўзининг тиниқлиги, шифобахшлиги каби устунликлари билан айниқса ёзнинг жазирама кунлари ажралиб туради. — Газетадан

Бир ёʻла кенгайтирилган коммутация системаси овозда ғоятда яхши тембр ва тиниқликни ҳосил қилади. — Газетадан

Шунча шаддодлиги, фикрининг тиниқлиги, чаққонлиги билан Бадиа Худодбекка хотин бўлармикин? — Мирмуҳсин, Меъмор

фл. Тиниқламоқ феълининг мажҳул нисбати.

фл. Тиниқмоқ феълининг орттирма нисбати.

фл. Тиниқ, мусаффо, равшан, тоза бўла бормоқ.

Овози яна ҳам тиниқлашди.

Анҳордаги сув тиниқлашиб, зилол ранг касб этганди. — Ф. Мусажонов, Ҳиммат

Саиднинг назарида, Бекобод осмони тиниқлашиш билан бирга кенгайгандек эди. — Й. Муқимов, Олов ва ниҳоллар

Сафарлар, учрашувлар, суҳбатларда фикринг яна тиниқлашади. — Зулфия, Чўққилар