sft. 1. Jismoniy, ruhiy jihatdan zaiflashmagan; bardam.
Onam yetmishdan oshib qolgan boʻlsalar ham, hali ancha tetiklar — M. Qoriyev, Oydin kechalar
Ibrohim ota bardammi, Oysha xola tetikmi, ukang Sherniyoz sogʻmi? — J. Sharipov, Xorazm
Ogʻaynilar tushkunlikka tushmadilar. Quvnoq va tetik kayfiyatda xayrlashdilar. — F. Musajonov, Himmat
2. Harakat-holati, darajasi va shu kabilar jihatdan bardam, tiyrak.
Temirjon odamlar qatori koʻpaygan trotuarda ildam va tetik qadam otib borardi. — J. Abdullaxonov, Oriyat
Aziza oʻzini bir oz oldirgan, ammo hamon oʻshanday chiroyli, koʻzlari kirtayib qolgan boʻlsa ham, tetik boqar edi. — Oʻ. Hoshimov, Qalbingga quloq sol
Soylik tomondan kelayotgan tetik va yangroq ovoz Elmurodning oʻyini buzdi. — Shuhrat, Shinelli yillar
3. koʻchma Hayiqishni bilmaydigan, dadil gapiradigan, oʻz fikrini baralla ayta oladigan.
Qandolat opaga ne balo boʻldi, deyman, hayron boʻlaman. Gapga chaqqon, tetik xotin edi-ku! — Oydin, Sadagʻang boʻlay, komandir
Pochchayev, qurilishga biron fikri tetikroq bola kelib qolsa, darrov iziga tushadi. — A. Muxtor, Tugʻilish