Поиск

ot 1. Asosiy yoʻl, oqim va shu kabilardan boʻlinib, ajralib chiqqan qism; shoxobcha.

Temir yoʻl tarmoqlari. Daryo tarmogʻi.

Bu pastak togʻ Fedchenko muzlik togʻlarining tarmoqlaridan biri boʻlib, mahalliy aholi tomonidan Muzloq togʻ deb atalardi. — M. Ismoiliy, Fargʻona tong otguncha

Dastavval bosh soqadan boshlab katta anhorlar, soʻngra uning tarmoqlari qazilardi. — J. Sharipov, Xorazm

2. Asosiy tashkilot yoki birlashma shoxobchasi.

Aloqa tarmoqlari. Maorif tarmoqlari.

Haligi xat bahona savdo tarmoqlari va sanoat korxonalarida boʻldik. — Gazetadan

Tez tarmoq yoymoqda boʻlgan maorif: son-sanoqsiz maktablar, internatlar, kattalar uchun kechki kurslar, bir oz boʻlsa ham oʻqigan odamlarga muhtoj edi. — A. Qahhor, Qoʻshchinor chiroqlari

3. Fan-texnika, qishloq xoʻjaligi va shu kabilarga oid soha, sohalar.

Xoʻjalikning muhim tarmoqlari. Fan va texnika tarmoqlari. Qorakoʻlchilik respublika chorvachiligining muhim tarmoqlaridan biridir.

Bu yerda gʻalla bilan chorva asosiy tarmoq hisoblanadi. — Sharq yulduzi

ot esk. ayn. Oluv 2.

Oʻndan uchni tarh qilsa, yetti qoladi.

ot Bukilgan, qaytarilgan joy; narsaning buklangan rahi; tax.

Doʻppining tarki. Qatorning tarki.

Botir aka shoshib qoldi shekilli, gazetaning tarkini topib ocholmay, uning bir chekkasini yirtib ham qoʻydi. — X. Toʻxtaboyev, Felyetondan soʻng

taql. s. Gazmol yirtilganda, tartarak tarillaganda chiqadigan va shunga oʻxshash ovozni bildiradi.

Yaktak tarr etib yirtildi.

Roʻparadagi uyning tomidan tarr etgan tovush eshitildi. Qizil askar zinaga yiqildi. — A. Qahhor, Oltin yulduz

taql. s. Tarang yoki qattiq narsa yorilganda, singanda yoki urilganda chiqadigan ovozni bildiradi.

Qovun tars yorildi.

U eshikni tars etib yopdi.

Hasan akaning chakkasiga ham bir nima tars etib tegdi. — A. Muhiddin, Inson qalbi otash

— Eh, — Akram tizzasiga tars etkizib urdi-da, kreslodan sapchib turdi. — S. Anorboyev, Oqsoy

ot 1. (3-shaxs egalik shaklida — tarzi) Oʻzi bogʻlanib kelgan (oʻzidan oldin qoʻllangan) soʻz bildirgan narsaning yoʻsini, koʻrinishi, holati maʼnosini anglatadi.

Hayot (turmush) tarzi.

Onasining gaplari Sanamga hech yoqmagan, lekin gapning tarzidan onasining kampir bilan hamfikr ekanini anglagan edi. — Sh. Xolmirzayev, Toʻlqinlar

Suv muzga aylanganda, modda zarralarining harakat tarzi oʻzgaradi. — Fan va turmush

2. (3-shaxs egalik va oʻrin-payt kelishigi shaklida — tarzida) Ish-harakat, narsa-hodisaning yoʻsini, ravishi maʼnosini bildiradi; yoʻsinida, sifatida.

Koʻngli tortib yurgan odami aytgani uchun xafa boʻlmadi, ammo hazilga hazil tarzida shoʻxlik qildi. — A. Qahhor, Qoʻshchinor chiroqlari

Davra suhbati savol-javob tarzida oʻtdi. — Gazetadan

Shu sababli oʻzingizga sir tarzida aytamanki, Angliya tez orada jahoniy davlat mavqeyini yoʻqotadi. — A. Hakimov, Ilon izidan

3. (oʻrin-payt kelishigi shaklida — tarzda) Belgi bildiruvchi soʻzlar, shuningdek, ayrim olmoshlar bilan qoʻllanib, shu soʻzlar anglatgan belgili holatni, harakat-holatning shunday holat, yoʻsin bilan boʻlishini bildiradi; yoʻsinda, holda.

Hafiz Mirzamuhamedovich odatiga xilof tarzda koʻproq gapirib qoʻyganini payqadi shekilli, birdan toʻxtab qoldi. — S. Karomatov, Oltin qum

Musavvirlar kitobning mazmuniga hamohang tarzda rasmlar chizishgan — Fan va turmush

Shu tarzda ishlar juda sekin siljidi. — P. Qodirov, Uch ildiz

4. koʻm. vzf. (3-shaxs egalik va oʻrin-payt kelishigi bilan — tarzida) Oʻxshatish, qiyos munosabatini bildiradi; sifatida, kabi.

Oʻlpon toʻlashdan bosh tortganlari uchun, oʻn olti ming Xilari jarima tarzida tortib olib kelindi. — P. Qodirov, Yulduzli tunlar

5. shv. Yuz, chehra; qiyofa, ahvol.

Tarzing bordir oy-u kundan ziyoda. — Oysuluv

Tarziga qarasang, bir lochin — shunqor. — Bahrom va Gulandom