fl. 1. Magʻrurlanib oʻzini yoʻqotmoq, kekkaymoq.
Kamtar boʻl, taltayma, kekkaymagil tik! Doʻst uchun zahar yut, shirin jonni tik! — Yo. Mirzo
Muvaffaqiyatlar har qancha katta boʻlganida ham, rahbarning taltayib va kibrlanib ketishga haqi yoʻq. — Gazetadan
2. Oyoq-qoʻllarni yozib, yalpayib oʻtirmoq, yotmoq, yastanmoq.
Taltayib oʻtirmoq.
Oʻktam tong otgandan soʻng qalin, yumshoq toʻshakda taltayib yotgisi kelmadi. — Oybek, Oltin vodiydan shabadalar
3. Siylagan, hurmat-izzat qilgan yoki erkalagan sari haddan oshmoq, suyulmoq.
Taltayib oʻsgan bola. Erka tutsa onasi, taltayadi bolasi. — Maqol
Meʼmor boʻlsa ikki shogirdning sal quyushqondan chiqib, taltayishayotganidan ensasi qotib kelardi. — Mirmuhsin, Meʼmor
Undaqa taltaymang. Indamaganim sayin, quyushqondan chiqib ketyapsiz. — Oybek, Oltin vodiydan shabadalar