Қидирув

от 1. Мушуксимонлар оиласига мансуб, калта ва сарғиш юнгли (эркаклари эса қалин ёлли) йирик сутемизувчи йиртқич ҳайвон; арслон.

Овчининг зўри шер отади, Деҳқоннинг зўри ер очади. — Мақол

Ўзингни эр билсанг, ўзгани шер бил. — Мақол

Булар [уч оғайни ботирлар] тушган тўқайнинг нариги томонида бир шернинг макони бор эди. — Эртаклар

2. кўчма Шахсни шерга нисбатлаб атайди (“азамат“, “ботир“ полвон маъносида).

Бу ҳужжатни бутун раёнга тарқатмоқчимиз, шер, обрўйинг ошиб, чўққига кўтарилаётганингни биласанми? — И. Раҳим, Ихлос

— Балли, шер, хатни қўлингиздан ким олди? — Бир чол. — А. Қодирий, Ўтган кунлар

Ёппа ёв-лик отга мининг, шерларим. — Юсуф ва Аҳмад

Фиғон қилган бунда шерлар, Ёʻлбарс, қоплон, бунда эрлар — Баҳром ва Гуландом

от 1. Бирор иш-ҳаракатни бирга бажарувчи; ҳамкор.

Аҳмаджон шериги билан гранаталарни чоғлаб, ҳаёт-мамот пайтини кутиб туришди. — А. Қаҳҳор, Олтин юлдуз

[Қодирқул:] Жим, аҳмоқ! Бойнинг бултур кузак бир қашқа оти ёʻқолган. Икки минг сўм пули саройдан ўғирланган. Шуларни ҳам сен ўғирлагансан. Гапир, шерикларинг кимлар? Ҳамза, — Бой ила хизматчи

Дўсматов тупроқни канал ўзанидан чеккага отиб берар, шериги эса нарига итарарди. — Ўзбекистон қўриқлари

2. Ўзаро бирга бўлган шахс, бирга ҳолатдаги шахс (бирга турган, бирга юрган ва ҳоказо).

Икки кишилик палатага жойлашдик. Шеригим бетлари қип-қизил, ўсиқ қошларига битта-иккита оқ тушган бир киши эди. — Н. Аминов, Қалтис ҳазил

Узунроғи тўхтади, шериги югургилаб келди — С. Сиёев, Ёруғлик

3. Бирор жиҳатдан, қайсидир жиҳат билан ўзаро бирга (биргаликда) бўлган икки шахс ёки шахслар; оғайни, дўст ва шу кабилар шахслар.

Равшан тушликда шўрвага навбат олди. Шериклари тандирдан янги узилган сомсани столга уйиб, жам бўлишиб, Равшанни кутиб туришди. — Ёшлик

Аваз шериклари билан дахма эшигидан четроқда турибди. — С. Сиёев, Ёруғлик

4. Бирор нарсага бир хилда талабгор, бир тан бўлган шахс.

Хуллас, икки группага бир хилда хизмат қилганим учун, униси ғолиб чиқса ҳам, буниси ғолиб чиқса ҳам, мукофотга шерикман. — Х. Тўхтабоев, Ширин қовунлар мамлакати

Бу ердан бир қоп олтин топиб олдим. Шерик бўламан десанг, чиқ! — О. Ёқубов, Излайман

5. с. т. (фақат 3-шахс бирлик шаклида — шериги) Бир хил ёки бир жуфт нарсаларнинг ҳар бири.

Бу туфлининг шериги қани?

Бу қўйни олиб бориб, шериги билан яна бир-икки ой боқинг — А. Қаҳҳор, Қўшчинор чироқлари

сфт. 1. Шеърга оид, шеърга хос.

Бобурда бунчалик шеърий истеъдод бор деб ўйламаган Биноий бир лаҳза ҳайратланиб турди-ю — П. Қодиров, Юлдузли тунлар

Масал — ҳажми унча катта бўлмаган, насрий ҳамда шеърий ёʻл билан ёзиладиган мустақил сюжетга эга бўлган эпик асардир. — УТА

2. Шеър билан ёзилган.

Шеърий асар.

Мармар тошдаги шеърий битик уни гўё адл-у инсофга, мурувват ва шафқатга ундагандек бўлиб турарди. — С. Сиёев, Ёруғлик

сфт. Довюрак, жасур.

1. Шердор мадрасаси — Самарқанддаги меъморий ёдгорлик (1619—1636). Регистон ансамбли таркибида. Мирзо Улуғбек хонақоҳи ўрнига Ялангтўш Баҳодир қурдирган. Улуғбек мадрасасининг рўпарасида жойлашган. Мадраса тарҳи тўртбурчак, 2 қаватли. Бош тарзининг 2-қанотида қовурғали гумбаз ва миноралар жойлашган.

2. Мадраса пештоқ равоғи ичкарисидаги кошинкори безак орасида қора заминли кошинга оқ ҳарфлар билан меъмор Абдужаббор номи ёзилган. Қаносларидаги қизғиш зарҳал тусли шер оқ оҳуни қуваётгани тасвирланган. Қуёш бодомқовоқ, қийиқ кўзли қилиб тасвирланиб, юзи зарҳал тусли ёғду билан ҳошияланган. Мадраса номи шу тасвирдан келиб чиққан.

Одамларнинг маълумотлар, турли хизмат турлари ва шу каби нарсаларни бошқа одамлар билан баҳам кўриш амалиёти. Бу янада самарали фойдаланиш ва арзонроқ харажатлар учун автомобиллар, квартиралар, билим ва бошқа ресурсларни алмашишни ўз ичига олиши мумкин.

Шеринг хизмати мулк эгасига фойда келтирадими? Нима деб ўйлайсизлар.