Қидирув

сфт. Севинса арзийдиган, қувонарли.

Севинарли натижа.

фл. 1. Ишқ-муҳаббат туйғуси билан муносабатда бўлмоқ; кўнгил қўймоқ, яхши кўрмоқ.

Жонгинам, мен сенга кўрсатай вафо, Гуллаган баҳорим, сени севаман. — У. Исмоилов, Сайланма

Шу топдагина у [Алимардон] Муқаддамни севганини, қаттиқ севганини тушунди. — Ў. Ҳошимов, Қалбингга қулоқ сол

2. Меҳр-муҳаббат, садоқат кўрсатмоқ; ғамхўрлик қилмоқ.

Ватанни севмоқ. Онани севмоқ.

Она ўз ўғлини севади фақат — Ҳ. Олимжон

Отам бўлмасангиз ҳам, мени отам муҳаббати билан севган содиқ ва меҳрибон бир кишимсиз, яъни маънавий отам. — А. Қодирий, Ўтган кунлар

3. Ёқтирмоқ, яхши кўрмоқ.

Мусиқани севмоқ. Гулни севган тиканни ҳам севади.

Нури кийинишни, безакни севар эди. — Ойбек, Танланган асарлар

от 1. Қарама-қарши жинсдаги одамларнинг (эр ва хотин, йигит ва қизнинг) бир-бирига нисбатан чуқур интим, чин қалбдан ва фидокорона илиқ муносабат туйғуси; ишқ, муҳаббат.

Севги пулга сотилмас, кўнгил пулга топилмас. — Мақол

Муҳаббат унинг [Гулнорнинг] юрагини ҳар кун яна чуқурроқ эгаллаб, дардини кучайтиргач, севгининг чин маъносини тушуна бошлаганди. — Ойбек, Танланган асарлар

Севги одамнинг юрагига тиниқлик, нур, кўнглига эзгу орзулар солади дейишади. — С. Аҳмад, Суд

Севгини тортиб бўларми Тошу тарозу билан — Э. Воҳидов, Муҳаббат

2. Бирор яқин кимса ёки нарсага нисбатан меҳр-садоқат, меҳр-муҳаббат туйғуси.

Вақтим чоғ этган — Ватан севгиси! Кўксим тоғ этган — Ватан севгиси! — Ё, Мирзо

сфт. 1. Кишининг кўнгил қўйган дилдори; ёр, маъшуқ(а), маҳбуб(а).

[Темиржон] Қандай бўлмасин, севгилисининг қўнғироқдай товушини эшитиш дардида изтироб чекар, юраги дам-бадам ҳаприқиб турарди. — Ж. Абдуллахонов, Орият

Севгилим, сени деб куйдим қанчалар, Севгилим, юракда дардим лиммо-лим. — Ёшлик

2. сфт. Севикли, севимли, яхши кўрган.

Севгили ёр.

Ҳаёт, қулоқлари ёнида севгили оҳанги бирдан янграб кетгандан, шодлик ҳаяжони билан талпинди. — М. Исмоилий, Фарғона тонг отгунча

сфт. 1. айн. Севгили И.

Шу келишган, хушбичим, башанг кийинган йигит, назарида, худди севикли Холдорбекка ўхшаб кетди. — К. Яшин, Ҳамза

2. Энг қадрли, севимли.

Севикли ўртоқ. Севикли ўқитувчи.

Севикли устознинг кутилмагандаги буйруғи Зулфиқорнинг ҳафсаласини пир қилди. — Мирмуҳсин, Меъмор

сфт. 1. айн. Севгили 1.

Акрамхон шу севимли қизнинг севиклиси бўлишни истар, аммо бундай бахтга эришиш осон эмаслигини биларди. — И. Раҳим, Тинимсиз шаҳар

У [Зебо] севиб, севимли бўлганидан мамнун эди, бахтиёр эди. — Шуҳрат, Шинелли йиллар

2. Ёқтирадиган, яхши кўрадиган, суюкли.

Севимли касб. Севимли мусиқа.

Анвар ҳар ким учун севимли ва хушмуомаласи барчага баравар эди. — А. Қодирий, Меҳробдан чаён

Чой миллионлаб кишиларнинг севимли ичимлигидир. — Газетадан