Qidiruv

sft. 1. Bir tekisda va toʻxtovsiz boradigan yoki borayotgan, silliq.

Ravon harakat. Mashina ravon ishlayapti. Gʻoʻzalar ravon oʻsmoqda.

2. Bir tekisda, tinch oqayotgan.

Ravon suv. Obi ravon. Uning koʻz yoshi ravon.

Toʻlqinlar shovullar, soʻng oqar ravon, Tutashgan besh dengiz, oʻnlab daryolar. — X. Rasul

Kechasi charx-palak yangi joyga koʻchirildi va tongotarda dashtga bir joʻyak suv ravon oqdi. — I. Rahim, Chin muhabbat

Kemalar ravon oqib ketishdi. — Mirmuhsin, Temur Malik

3. Toʻgʻri va tekis (yoʻl haqida).

Ravon yoʻl. Yomon yoʻldosh yov boʻlar, ravon yoʻlda gʻov boʻlar. — Maqol

Hamma yoq serqatnov, ravon yoʻl, hamma yoq adil imoratlar, qasrlar, bogʻlar, fontanlar — H. Gʻulom, Zamin yulduzlari

4. Mantiq va uslub jihatidan puxta va silliq, bir-biriga yaxshi bogʻlangan.

Ravon sheʼr. Ravon uslub. Uning nutqi ravon. Ravon oʻqimoq.

Adolat sheʼrni ravon, chiroyli oʻqidi. — S. Zunnunova, Olov

Nutqi ravon bolalarning baholari, koʻpincha, yuqori boʻladi. — Saodat

Muharram ravon gapirardi. Uning bunday nutqni birinchi marta soʻzlamayotganligi koʻrinib turardi. — Shuhrat, Shinelli yillar

Yangi yerda yangi chaman yaratgan qizlar, Yangramoqda yangi, ravon kuylaringiz-a! — T. Toʻla

5. koʻchma Silliq, bir tekis.

Ha, hayot ravon emas, Bordir past-u balandi Shu fikrga kelganda, Yana bob tugallandi. — A. Muxtor, Asarlar

Aql va baxt birlashsa, insonning hayot yoʻli ravon boʻladi. — Gazetadan

Biroq hayotning ravon yoʻlidan koʻra soʻqmogʻi koʻp. — S. Karomatov, Oltin qum

6. Oson va bir tekisda harakatlanadigan, ishlaydigan.

Ravon eshik. Charxi ravon.

7. ayn. Ravona.

Devning aslahasin Shakar oladi, Otlanib Shakarbek ravon boʻladi. — Shirin bilan Shakar

ot Mantiq va uslub jihatdan puxtalik, silliqlik, tiniqlik.

Tabiiy sheʼriy ravonlik, fikriy burrolik oʻrnini oʻzaro mantiqan yopishmaydigan soʻzlardan tuzilgan noqulay misralar egallagan. — Gʻ. Salomov, Tarjima nazariyasiga kirish

Boburnoma xalq tiliga yaqinligi, soʻz va iboralarning ixcham, puxta va ravonligi bilan mashhurdir. — Fan va turmush

fl. s. t. Ravon boʻlmoq, silliqlashmoq.

Mashina zarb bilan siltanib, tagʻin shitob bilan olgʻa intildi, sozdan soʻng motor tovushi yana ravonlashdi. — Sharq yulduzi

ot 1. Oqar suv.

2. Chashma, buloq.

sft. 1. Jismonan baquvvat, bahodir, botir, pahlavon.

Har biri mingga tenglashadigan zoʻravon edi. — Bahrom va Gulandom

2. Zolim, zulm oʻtkazuvchi hukmdor.

Agar u [Bobur] Samarqanddan voz kechsa, narigi zoʻravonlar poytaxtni olishi, keyin Andijonga bostirib kelishi muqarrar ekani unga hozir juda aniq sezilmoqda edi. — P. Qodirov, Yulduzli tunlar

3. Umuman, oʻzgalarga qonunsiz ravishda kuch ishlatuvchi, zoʻrlik qiluvchi shaxs.

Yoʻlchi bir sakrashda zoʻravonning oldiga bordi, toʻpponcha tutgan qoʻlini mahkam siqib, orqaga qayirdi. — Oybek, Tanlangan asarlar

Xoʻsh, zoʻravon sizmi yo bu bechora, bekas, benavo shoirmi? [dedi Zavqiy]. — K. Yashin, Hamza