fl.
1.
Qora tus bermoq, qora tusga kiritmoq, qora rang bilan boʻyamoq, qora qilmoq.
Matoni qoralamoq. Oynani qoralab, quyosh tutilishini kuzatmoq.
Mototsikl yerga agʻanagancha, benzini toʻkilib, qor yuzini qoraladi. — J. Abdullaxonov, Toʻfon
2.
Qoralama matnni, nusxasini tayyorlamoq, qogʻozga tushirmoq.
Burnogʻi yili bir roman qoralovdim, uka. Qoralama chang bosib yotuvdi. — M. M. Doʻst, Lolazor
Ishning boshida, rasmlarning chizgilarini qoralab, ora-sira chalgʻish uchun shamdonlarni doʻqillatib yasab yurgan kezlarida ustaxonasiga Abdumalik kirib keldi. — Yoshlik
3.
koʻchma
Ayblab, yomonlab gapirmoq yoki yozmoq.
Bu bilan men Zokir ota bilan Roʻzimatni qoralab, oʻzimni oqlamoqchi emasman. — A. Qahhor, Qoʻshchinor chiroqlari
Ahmedov oʻz soʻzida yangi direktorning oʻqituvchilarni yomon va yaxshiga ajratib olganligini qoraladi. — S. Zunnunova, Olov
4.
Koʻzdan qochirmay, qorasiga qarab, qorasini olib yurmoq, qorama-qora bormoq.
[Zikir] Ayolga uzoqdan salom ishorasini bildirgach, tollar orqasidan yurib, uni qoralab kelaverdi. — Sh. Gʻulomov, Yorqin ufqlar
Ergash aka izni qoralab, uch-toʻrt qadam bosdilar-u, toʻxtab qoldilar. — Sh. Xolmirzayev, Ogʻir tosh koʻchsa
5.
Son-miqdor bildiruvchi soʻz bilan qoʻllanib, shu soʻz anglatgan yoshga yaqinlashishni bildiradi.
Saksonni qoralagan chol.
Nizomov oltmishni qoralagan baqaloq kishi edi. — S. Siyoyev, Otliq ayol
