Qidiruv

sft. Qanoti bor, qanotga ega boʻlgan (

Uzun qanotli qush. Toʻrt qanotli kapalak. Aqlli ish — qanotli qush. — Maqol

Bilgani shoʻxlik uning, Gul qanotli kapalak. — Gʻayratiy

ot 1. Qush va hasharotlarning uchish aʼzosi.

Gʻozning qanoti. Qaldirgʻochning qanoti. Kapalakning qanoti. Pashshaning qanoti. Hush qanoti bilan uchib, quyrugʻi bilan qoʻnar. — Maqol

Margʻilon va Qoʻqonga uchadigan maxsus kabutar keltirildi. Naycha qilingan qisqa xatlar ularning qanotlari tagiga mahkamlandi. — P. Qodirov, Yulduzli tunlar

Nozik rang-barang parvonalar, kapalaklar lampa atrofida aylanar, guldor qanotlarini shishaga urib tipirchilar, gilamga yengilgina qulab, tinar edilar. — Oybek, Tanlangan asarlar

2. koʻchma Shaxs yoki narsaning uchishi, parvoziga xizmat qiluvchi aʼzosining ramzi maʼnosini bildiradi.

Ot — yigitning qanoti.

Yangilikning qanoti bor. Ogʻizdan ogʻizga oʻtib, tez tarqaladi. — Gazetadan

Hamza boʻlsa, xayol qanotida oʻtmishni birma-bir kezib chiqdi. — K. Yashin, Hamza

Shundoq deb Ilhomning nozik va mayin Qanotlarin Hasad yulib tashladi. — A. Oripov, Yillar armoni

Umumxalq jonkuyarligi oʻqituvchilarga qanot baxsh etyapti. — Gazetadan

3. Samolyotning yerdan koʻtarilib, havoda muallaq turishi uchun xizmat qiladigan qanotsimon yoyiq qismi.

4. Avtomobil, velosiped kabi mashinalar gʻildiragi ustiga loydan himoya qilish uchun oʻrnatilgan moslama.

[Yigit] Oldingi qanoti sinib qolgan Zif velosipediki sekingina haydab kelyapti. — Sh. Otamurodov, Koʻngil

Avtomobil qanoti alyuminiydan ishlanadi. — Fan va turmush

5. Eshik, deraza va shu kabilarning tabaqasi.

Yunusov derazaning qanotlarini ochib, kesakisiga qulochini yozgancha turib qoldi. — N. Maqsudiy, Majlisdan soʻng

Uzoqdan Botirning ustma-ust bergan signali eshitilgandan keyin katta darvozaning qanotlari keng ochildi. — I. Rahim, Ixlos

6. Yoyiq, choʻziq narsalarning biror tomoni, yoni, chekkasi.

Binoning soʻl qanoti — eshik oldi baland ayvon. — A. Qahhor, Yangi yer

Koʻchalar qanotidagi ariqlarda zilol suvlar sharqirab oqib turibdi. — J. Ergashev, Gulbuloq

7. Zina, koʻprik va shu kabilarning yoniga oʻrnatilgan toʻsiq; panjara.

Mahkam zinapoyaga qarab chopdi va uning silliq yogʻoch qanotidan ushlab, uchinchi qavatga yugurib chiqdi. — P. Qodirov, Uch ildiz

Tohir koʻprikning qanotidan pastga egilib qarab, shu tirgaklardan birini moʻljalga oldi-yu, toʻxtadi. — P. Qodirov, Yulduzli tunlar

8. harb. Yoyiq joylashgan qoʻshinlarning, frontning oʻng yoki soʻl tomoni, shu tomon qismi.

Mirzo Yodgorning oʻng va soʻl qanotlari qattiq shikast yeb, butunlay bebosh-betartib qochishga yuz tutgan edi. — Oybek, Navoiy

Bobur qoʻshini yov bilan yuzma-yuz toʻqnashishi uchun oʻng qanotini oldinroq chiqarib, daryoga orqa oʻgirdi-yu, janubga tomon burila boshladi. — P. Qodirov, Yulduzli tunlar

9. koʻchma Suyanchiq, koʻmakchi.

Yorim boʻlsa, qanotim, deyman. — Sayyor.

U [Nizomjon] Ikromjonga oʻgʻil boʻldi. Uning qoʻsh qanoti boʻldi. — S. Ahmad, Ufq

10. koʻchma Diqqat-eʼtiborda boʻlish holati; himoya, homiylik, panoh.

Ustozlar qanotida, ularning koʻmagi va yoʻl-yoʻriqlari asosida ilgʻorlar tajribasini oʻrgandim. — Gazetadan

Uning qanotida koʻpdan-koʻp yosh talantlar tarjimonlik, tahrirchilik singari murakkab ishning sir-asrorini bilib oldilar. — X. Yodgorov, Hayot toʻlqinlari

sft. Qanotga ega boʻlmagan.

fl. Qanotlamoq feʼlining majhul nisbati.

sft. 1. Ikkita qanoti boʻlgan, ikki qanotli.

Qoʻshqanotli samolyot,

Bu xat menga hayot berdi, Bagʻishladi qoʻshqanot. Chapak chalib tabrikladi Goʻyo meni koinot. — Shuhrat

2. Ikki tavaqali, qoʻshtavaqali.

Oʻz umrida birinchi marta Ochildi qoʻshqanot darvoza. — E. Rahim

Yengil mashina sigʻadigan qoʻsh-qanotli eshikdan pochtalon kirib keldi. — A. Ubaydullayev, Hayot oqimi

ot 1. Qanot va quyruq.

Qanot-quyrugʻi yulingan tovuq.

2. koʻchma Suyanchiq, koʻmakchi; himoyachi.

Bironta tuzuk tanish-bilish, qarindosh-urugʻ bormi? Keng qirdagi yakkaoyoq yoʻldek yolgʻizman. Odamlarga oʻxshab qanot-quyrugʻim yoʻq. — S. Abduqahhor, Gap norda emas

Hali unga qanot-quyruq boʻlib yurganlar koʻp. — P. Tursun, Oʻqituvchi