fl. 1. Atroflab oʻrab olmoq, qurshamoq.
Shahar atrofini oʻrmon qamragan. Dushman istehkomini qamrab olmoq.
Kosa koʻtargan xotin-xalaj qozon atrofini qamrab oldi. — P. Tursun, Oʻqituvchi
2. Yoyilib, tarqalib, maʼlum joyni egallamoq; bosmoq, tutmoq, qoplamoq.
Yongʻin butun uyni qamrab oldi.
Kecha gupullab qor tashladi, bugun uning qora sovugʻi hamma yoqni qamrab oldi. — M. Ismoiliy, Fargʻona tong otguncha
Roziqning aʼzoyi badanini yana oʻlim dahshati qamradi. — S. Anorboyev, Oqsoy
Butun borliqni qamrab olgan chirillash mana shu mitti jonivorlarnikiligiga ishonging kelmaydi. — Yoshlik
3. Oʻzida mujassamlantirmoq, aks ettirmoq, ifodalamoq; oʻz ichiga olmoq.
Juda katta davr tarixini qamrab olgan asar.
U [Navoiy] minglarcha yilgi madaniyatni, asrlarning fikr boyligini qamragan shoir edi. — Oybek, Navoiy
U tiniq daryo, musaffo osmon, cheksiz kengliklar haqida oʻylanar va xayoli shunday ulkan narsalarni bemalol qamrab olayotganidan hayron boʻlardi. — P. Qodirov, Uch ildiz