fl. 1. Oʻrtasidan, ichidan yurmoq, oʻtmoq; kezmoq.
Ahmadjon nemislar butalarni oralab yuz ellik metrcha yaqin kelganda, ustma-ust ikki sidra oʻq yogʻdirdi. — A. Qahhor, Oltin yulduz
Qoʻshiq oralaydi orolma-orol, Asrlar uyqusin buzib, uygʻotib. — T. Toʻla
2. Yashirinib kirmoq, paydo boʻlmoq, dorimoq.
Qishloqqa boʻrilar oralab qoldi.
3. Suqilib kirmoq.
[Domla:] Joʻraboy, koʻnglingizga shayton oralab qolibdi, kalima keltiring. — I. Sulton, Burgutning parvozi
4. Aralashmoq.
[Botirjon:] Kolxoz roʻzgʻoriga harom qoʻl oralaganini sezib, qarab turolmadim. — N. Safarov, Hayot maktabi
5. Bitta-yarim tushmoq, ora-sira paydo boʻlmoq.
Qori bitta-ikkita oq oralagan choʻqqi soqolining uchini ushlab iljaydi. — A. Qahhor, Qoʻshchinor chiroqlari
6. Ikki orada, kishilar oʻrtasida paydo boʻlmoq, tugʻilmoq.
[Opogʻoyi] Zaynab siqilmasmikin, ikki oʻrtaga sovuqchilik oralamasmikin, deb qoʻrqadi. — A. Qodiriy, Oʻtgan kunlar
- Kun oralab Kun osha, oradan bir kun oʻtkazib, kun ora. Baʼzan har kun, baʼzan kun oralab kechqurun Unsinni koʻrgali [Yoʻlchi] Shokir otanikiga keldi. — Oybek, Tanlangan asarlar
- Oy oralab Oradan bir oy oʻtkazib, bir oy osha. Jurnal oy oralab chiqadi.