Поиск

ot 1. Oʻqimoq 1 feʼlidan sifatdosh.

Kitob oʻquvchi bola. Bir ozdan keyin yonidagi jurnal oʻquvchi yigitga murojaat qildi.

2. Biror oʻquv yurtida (asosan, maktabda) taʼlim olayotgan shaxs.

Yetti yillik maktab oʻquvchilari.

Maktabning ochilganiga ikki hafta boʻlmay, oʻquvchilarning soni oʻttizdan oshib ketdi. — M. Ismoiliy, Fargʻona tong otguncha

Yosh-yosh qizlar, oʻquvchi bolalar safdagi yigitlarga guldastalar uzatmoqdalar. — I. Rahim, Chin muhabbat

3. Vaqtli matbuot yoki adabiyotning maʼlum bir turini muntazam oʻqib turadigan shaxs.

Mushtum oʻquvchilari.

Gazeta oʻz xatosini ochiq aytib, oʻquvchilaridan uzr soʻrasa, obroʻyi tushar emishmi? — A. Qahhor, Qoʻshchinor chiroqlari

Oʻquvchining qimmatli vaqtini ayaganimdek, qalamni ham bu gʻidi-bididan ozod qilishni muvofiq koʻrdim. — A. Qodiriy, Oʻtgan kunlar

fl. 1. Past tomonga qarab uzluksiz, surunkasiga harakat qilmoq, yurmoq (suyuqlik haqida).

Oldingdan oqqan suvning qadri yoʻq. — Maqol

Qonqus tun boʻyi gʻazab bilan, alam bilan toʻlgʻanib oqdi. — Oʻ. Hoshimov, Qalbingga quloq sol

Filatovning bir qoʻli qon oqayotgan yelkasida, ikkinchi qoʻli pulemyot lentasida, boshi quyi solingan edi. — A. Qahhor, Oltin yulduz

2. Tez-tez tommoq, birin-ketin yumalamoq (tomchilar haqida).

[Qizning] Koʻzlaridan oqqan tomchilar quyoshda injuday yonadi. — Oybek, Tanlangan asarlar

Oshno doʻstining koʻzlaridan duv-duv yosh oqayotganini koʻrdi, xoʻrlandi — M. M. Doʻst, Lolazor

3. Suv oqimi bilan birga siljimoq, suzmoq.

Kelganlardan bir qismi soyning oʻrtasiga yetmasdan qaytishga majbur boʻldi. Ikki kishi oqib ketayozdi. — A. Qahhor, Oltin yulduz

4. Quyilib kelmoq; oʻtmoq.

Oʻtkazgichlardan elektr toki oqa boshladi.

5. koʻchma Kelib, tushib turmoq.

Konveyerlardan don oqadi.

Xona ichiga quyoshning iliq yorqin ipagi jimgina oqdi. — Oybek, Navoiy

6. Jarayon tarzida, koʻplashib biror tomonga yurmoq, oʻtmoq.

Otliqlar Oqmachit qiri tomon oqib borardi. — T. Ashurov, Oq ot

Ertalabdan boshlab qishloq aholisi maktab tomon oqdi. — P. Tursun, Oʻqituvchi

7. Toʻkilmoq, osilib tushmoq.

Ikki atrofda paxtasining choʻgʻi qochgan dalalar goh choʻp boʻlib gʻoʻzapoyasi qolgan, goh paxtasi egatlarga oqib tushgan paykallar bilan almashinadi. — M. Mansurov, Yombi

8. koʻchma Oʻtmoq, kechmoq.

Hayot bir maromda, bir izda oqa boshladi. — S. Abduqahhor, Koʻzlar

Yillar oqar yillarni yuvib, Taqdiriga tan berar havas. — A. Sher, Qadimgi kuy

ot 1. Yoyga qoʻyib otiladigan, uchi nayzasimon uzun, ingichka tayoqcha; tir.

Sadoqdagi oʻq.

U kamonga chapdastlik bilan oʻq oʻrnatdi va chopib borayotgan ot ustida nishonga otdi. — P. Qodirov, Yulduzli tunlar

2. Miltiq, toʻpponcha, pulemyot kabi qurollarga joylab otiladigan kichkina snaryad; patron.

Dushman pulemyoti birdan jimib qoldi, oʻqi tugagan pulemyotchi esa qocha boshladi. — N. Safarov, Olovli izlar

Oʻq ovoziga odam toʻplanganda, mis koʻza qorni pachaqlanib, tuproqqa agʻnab yotar edi. — P. Qodirov, Qora koʻzlar

3. Shunday snaryad, patronning otilgan-da ogʻzidan chiqib uchadigan, moʻljalga yoʻnaltiriladigan qismi (qoʻrgʻoshin, pitra kabi).

Oqilxontoʻra Boʻtaboyni moʻljallab otgan oʻq Tillabuvaga tekkan ekan. — A. Qahhor, Qoʻshchinor chiroqlari

Ortiq gilam toʻshalgan uyda, oynavand shkaf qarshisiga ayiq terisini yoyib, oʻq teshgan joylarini koʻzdan kechirayotgan edi. — P. Qodirov, Qora koʻzlar

4. Minomyot, reaktiv artilleriya va shu kabilar qurollardan otiladigan oʻq-dori; snaryad.

Front orqasida oʻra qazib turganda, Mulla Obiddan oʻttiz metrcha nariga bir katta toʻp oʻqi tushib, qattiq tovush chiqarib yorildi. — A. Qodiriy, Obid ketmon

ot Oʻquvchi boʻlish.

Oqadigan, doim oqib turadigan

Oqar daryo

Demak, bizning qilgan ishimiz izsiz ketmaydigan, umrimiz oqar suvdek bekorga oqmaydigan boʻlibdi — P. Tursun, Oʻqituvchi

sft. 1. Oʻtkir aql sohibi; aqlli, dono.

Oqil odam. Semiz qoʻzining goʻshti yaxshi, Oqil onaning — qizi. — Maqol

Sen [Umid] oliyjanob, oqila bir qiz muhabbatini oyogʻosti qilding, sen bu alamni oʻlguningcha tortasan. — Mirmuhsin, Umid

2. Aql bilan aytilgan, qilingan; bamaʼni.

Yorni goʻzal dema, oqil soʻzi boʻlmasa, Totli boʻlmas taom, agar tuzi boʻlmasa. — Oʻ.Mirzo

3. Oqil (erkaklar ismi).