fl. 1. Bir oyogʻi kaltaligi, mayib yoki kasalligi tufayli chayqalib, choʻloqlanib yurmoq, oqsoqlanmoq.
Xiyla olislab qolgan Mahmud aka sal oqsaganicha ketib borardi. — S. Zunnunova, Olov
Komandir Steklov oqsardi. U baʼzan beixtiyor ravishda tizzasini changallar, yuzlari, goʻyo alam gʻijimlaganday, bir on burishib ketardi. — Oybek, Quyosh qoraymas
2. koʻchma Sustlashmoq, orqada qolmoq, qoniqarsiz yoki past saviyada bormoq.
Yangi navlar yaratish, ertapishar, uzun tolali va har qanday kasalliklarga chidamli, ayniqsa, viltga chidamli navlar yaratish ishi oqsayapti. — Mirmuhsin, Umid
3. koʻchma Noqislik, kaltalik qilmoq.
Nega har bir narsaga yetgan aqling shunga kelganda oqsaydir. — A. Qodiriy, Oʻtgan kunlar
4. (chiqish kelishigi bilan) s. t. Kamchilik, yetishmovchilik tufayli qiynalmoq, yoʻqlikdan noiloj qolmoq.
Puldan oqsamoq.