Қидирув

от 1. Кафт-панжанинг зарб учун сиқимланган ҳолати; муштум.

Ботирнинг мушти ҳам яроғ. — Мақол

Қўрққан олдин мушт кўтарар. — Мақол

Нодирнинг қўллари мушт бўлиб, пай томирлари бўртиб чиқди. — С. Юнусов, Кутилмаган хазина.

2. Муштум зарби.

Тор жойда ош егандан, кенг жойда мушт еган яхши. — Мақол

Серсоқол, дов аскар билан олишиб, икки мушт билан уни гаранглатди. — Ойбек, Танланган асарлар

сфт. Қўлидан бирор иш келмайдиган, ожиз, бечора (аёллар ҳақида).

[Тўлахон:] Эй худойим, мен нима қиламан энди? Бир муштипар бўлсам. — Ҳамза, Паранжи сирлари

Орзу ҳавасингни кўрай, демаганмиди муштипар кампир. — И. Раҳим, Чин муҳаббат.

от 1. с. т. айн . муштдек.

Осмондаги бўз турғай, Бўзламасанг на бўлғай? Муштаккина жонингга Куйламасанг на бўлғай? П. Турсун, — Ўқитувчи

2. Эски вақтларда бозор тарозидорларининг сотилаётган нарсадан оладиган тарози ҳақи.

[ Ортиқ ака:] Мен сенинг молингни бойга таппа-тах ўлчаб бериб, бир ҳовуч муштак олишимни биламан. — С. Айний, Қуллар

сфт. Зориқиш, сабрсизлик билан кутувчи; эришиш, кўриш ва шу кабиларга истаги, иштиёқи кучли.

Она дийдорига муштоқ. Тўнғич ўғлининг бахтини кўришга муштоқ онанинг бошидан бир челак сув қуйиб юборилгандай бўлди. — Ҳ. Ғулом, Тошкентликлар

Атрофида унинг латифаларига, қизиқ-қизиқ ҳангомаларига муштоқ бўлган беш-олтита ўсмирлар. — С. Анорбоев, Оқсой

от 1. Папирос найчасининг тамаки тиқилмаган, оғизга олинадиган қисми.

2. Сигарет, ўралган махорка тиқиб чекиш учун мўлжалланган найча.

Муштум — Абдулла Қодирий томонидан ташкил этилган ҳажв ва кулги журналидир. Журнал 1923-йил 13-февралидан бери чоп этилади. Тошкентда ойда 1 марта чиқади. Муштумнинг 1-сони 1923-йил 18-февралда Туркистон газетасига илова (3 минг нусхада), 1924-йилдан Қизил Ўзбекистон нашри сифатида чоп этилган.