Qidiruv

ot 1. Toʻy, ziyofat va shu kabilar munosabati bilan yoʻqlab kelgan (borgan) shaxs.

Mehmon boʻlmoq. Mehmon qilmoq. Mehmon(ga) aytmoq.

Qutidor mehmonlarni ixlos va samimiyat bilan kutar, ziyofat quyuq-suyuqlari bilan toʻla-toʻkis davom etar edi. — A. Qodiriy, Oʻtgan kunlar

2. Majlis, yigʻilish, kengash va shu kabilarga chetdan chaqirilgan shaxs.

Sessiyaga chaqirilgan deputat va mehmonlar. Qurultoyda mehmon sifatida qatnashmoq.

Festivalning qatnashchilari va mehmonlari orasida taniqli davlat arboblari isteʼdodli ijodkor yoshlar bor. — Gazetadan

3. Chetdan tashrif buyurgan, vaqtinchalik qoʻngan shaxs.

Eshikni ochishi bilan: — Otdan qoʻningiz. mehmon. — dedi [usta Alim] otni Otabek qoʻlidan olgach. — A. Qodiriy, Oʻtgan kunlar

sft. Mehmoni boʻlgan, mehmon kutayotgan kishi; mezbon.

sft. Mehmonni, mehmon kutishni, mehmon chaqirishni yaxshi koʻradigan; mehmonsevar.

Mehmondoʻst oʻzbek xalqi.

Keng feʼl, odamshavanda, mehmondoʻst, tanti fargʻonaliklar Ahmadni maftun etdi. — F. Musajonov, Himmat

Toshkent oʻzining mehmondoʻstligi, xalqaro anjumanlar shahriga aylanib qolganligi bilan jahon xalqlari oʻrtasida doʻstlikni mustahkamlash ishiga katta hissa qoʻshmoq-da. — Gazetadan

hospitable.

ot 1. Mehmon kutiladigan uy.

[Safar boʻzchi] Bir necha marta kelib, Anvarning mehmonxonasiga oʻrganib qolgan edi. — A. Qodiriy, Mehrobdan chayon

Tabib, Meʼmor mehmonxonaga tayyorlangan dasturxon atrofiga oʻtirishdi. — Mirmuhsin, Meʼmor.

2. Musofirlarning vaqtincha turishi uchun jihozlangan xonalardan iborat bino; musofirxona.

Shahar mehmonxonasi. Mehmon-xonada turmoq.

Mehmonxonaning yettinchi qavatidagi restorandan orkestr sadosi, mastona qiyqiriqlar eshitiladi. — Oʻ. Hoshimov, Qalbingga quloq sol

sft. ayn. Mehmondoʻst.

Feʼli keng, soʻzi bir bizning togʻliklar. Koʻp mehmonnavozdir bizning togʻliklar. — X. Saloh, Togʻ — mening vatanim

Oʻzi ham, xotini ham gʻoyat mehmonnavoz. — Sharq yulduzi