Qidiruv

ot 1. Qiziqish, zavq hissi; shunday his-tuygʻuli munosabat.

Endi u boyagi dilsiyohlikni unutgan, osmoni falakda charx urayotgan turnalarga ajib bir havas bilan boqardi — S. Ahmad, Yulduz

Gulchehra yosh juvonlarga xos boʻlakcha havas bilan bezatilgan mehmonxonaga kirdi-da, divan chetiga omonatgina oʻtirdi. — O. Yoqubov, Larza

Havasga anor yeydi, deysiz shekilli — A. Qahhor, Anor

2. Biror ish-faoliyat, kasb-korga boʻlgan ragʻbat, intilish, istak, mayl.

Bolaning kitob oʻqishga havasi — bilimga ishtiyoqining ifodasi. — R. Usmonov, Odobnoma

Koʻnglida doʻppi gullarini tikishdan oʻzga havas yoʻqday, darrov ishga tushib ketdi. — M. Ismoiliy, Fargʻona tong otguncha.

Shifokorlik kasbiga Nasiba juda erta havas qoʻydi. — Gazetadan

Husayn Boyqaroning yoshlikdan sheʼrga havasi kuchli edi. — Oybek, Navoiy

sft. Havasi bor, havas qoʻygan; havasmand.

Men bu suhbatdan Pirakning aqli raso va har narsani oʻrganishga havasli boʻlganini payqadim. — S. Ayniy, Esdaliklar

Saidiy ashula aytishga havasli: oʻzi yolgʻiz qolgan vaqtlarida aytadi. — A. Qahhor, Sarob

sft. 1. Biror narsaga qiziqadigan, uni yaxshi koʻradigan (shaxs); havasmand, havasli, ishqiboz.

Havaskor ovchi. Musiqaga havaskor.

Nabigulning aytishicha, bular mahalladagi havaskor sozandalar edi. — A. Qahhor, Qanotsiz chittak

Bu yerda oʻnlab havaskorlar suvga tizzagacha tushib olib, baliq ovlashyapti. — Gazetadan

Yozuvchilikka havaskor boʻlgan yosh talantlarning asarlarini ilgarigidek xom-xatala bosib chiqarishga barham berilgan deyish mumkin. — N. Safarov, Olovli izlar

2. Kasb, hunar, sanʼat va shu kabilar boʻyicha mashgʻulotlar olib boradigan maxsus toʻgarak qatnashchisi (asosan yoshlar haqida).

Tikuvchilar artelining havaskor sozandalari toʻgaragi butun sostavi bilan kelgan. — A. Qahhor, Toʻy

Birinchi mashgʻulotda havaskor shoirlarning sheʼrlari yangradi. — Gazetadan

Bugun havaskorlarimiz televizorda chiqadi. Ularni koʻrmabsan, dunyoga kelmabsan — Sh. Saʼdulla, Ikki bilaguzuk

ot ayn. Havasli.

Shu paytda Beshariqdan Qoʻqonga, olti oylik kursga havasmand qizlarni yuborayotgan edik. — S. Abduqahhor, Oltin vodiylarni kezganda

U palov qilishga juda havasmand edi. — Oʻ. Ikromov, Unutilmas xotiralar

Yoshlar ichida sanʼat sohasiga havasmandlar ham yoʻq emas. — J. Abdullaxonov, Yoʻl

ot 1. Havaskorlarga oid, havaskorlar bilan ish, mashgʻulot olib borish.

Ochiq sahnada badiiy havaskorlik jamoalarining chiqishlari boʻldi. — Gazetadan

Joʻraxon rahbarligida havaskorlik toʻgaraklari, sport ishlari jonlandi. — Nazarmat, Joʻrlar baland sayraydi

2. Havaskorga xos holat, daraja.

Oʻrol Tansiqboyev havaskorlikdan koʻzga koʻringan rassom-peyzajchi boʻlib yetishgunga qadar katta mehnat va ijodiy izlanish yoʻlini bosib oʻtdi. — Gazetadan

3. Havaskor ekanlik.

Sening sanʼatga havaskorligingni bilaman.

fl. Havasi uygʻonmoq, havasi kelmoq; havas qilmoq.

— Toʻybekaning maqtaganicha bormi oʻzi? — Bor, — dedi qutidor va havaslandi: — Xudo kishiga oʻgʻil bersa, shundayini bersin-da! — A. Qodiriy, Oʻtgan kunlar

Maʼyus-mahzun xotiralarga berilib, havaslanganlar ham boʻldi. — Sh. Boʻtayev, Qoʻrgʻonlangan oy

shuncha unga tikilib havaslanganidan uyalganigami, yuzlari lov-lov yonardi. — R. Rahmon, Mehr koʻzda

Suvga, uning oynaday tiniqligiga Gʻulomjon juda havaslanib qarab turdi. — M. Ismoiliy, Fargʻona tong otguncha