Qidiruv

ot 1. esk. Metrik sistema qabul qilinganga qadar ishlatilgan, 0,71 metrga teng uzunlik oʻlchovi birligi; arshin.

Nurioy, oyingizdan toʻrt gaz chit olib berasiz, albatta. — Oybek, Tanlangan asarlar

Berdiboy tepaning moʻljalga kelgan joyidan oʻn besh gaz chamasi joyni kesib tushirdi. — A. Qodiriy, Gʻirvonlik Mallavoy

2. Shu uzunlikdagi oʻlchov asbobi.

Bukma gaz.

Hindi qoʻlidagi gazni peshtaxtaga qoʻydi. — M. Ismoiliy, Fargʻona tong otguncha

Tursunboy ochilgan qoʻriqni avval qadam-baqadam, soʻng gaz bilan oʻlchab koʻrdi. — Oʻzbekiston qoʻriqlari

ot shv. Adir, doʻng, balandlik.

Koʻp gapirgandan koʻra, qoʻlingga belni olda, gazaga chiq. — Yoshlik

Bugun katta gazaning machitida gap boʻldi. — Sh. Xolmirzayev, Qil koʻprik

Ochil bularning yurish qilganini koʻrib bir gazaning panasiga oʻtdi. — Fozil shoir, Ochildov

ot Kuchli darajada achchiqlanish hissi; qahr, jahl.

Gʻazab qilmoq. Gʻazab bilan gapirmoq. Gʻazabdan tushmoq.

Kechqurun jamoat jam boʻlganda, gʻazabdan koʻkarib ketgan kampir yetti pushtidan qolgan uch boylam vasiqani oʻrtaga koʻtarib urdi. — A. Qahhor, Qoʻshchinor chiroqlari

Odamlar Buvirajabni ushlashdi. Uning koʻzlariga hamon yosh kelmas gʻazabdan hansiragancha, qalt-qalt titrab oʻtirardi. — Yoshlik

ot Yaraning, shikastlangan joyning yalligʻlangan, yiring olgan holati.

Xalq juda koʻp shishlarni paxtadogʻ bilan davolaydi. Agar bu shish gazak shishi boʻlsa, paxtadogʻ foyda qiladi. — A. Qahhor, Qoʻshchinor chiroqlari

ot ad. Aruz sheʼriy tizimida uch baytdan oʻn toʻqqiz baytgacha boʻlgan, Sharq xalqlari, jumladan, oʻzbek adabiyotidagi lirik sheʼr (Birinchi baytning har ikki misrasi, qolgan baytlarning ikkinchi misralari qofiyadosh boʻlib keladi).

Hunarim, maʼlumingiz — gʻazallar yozish, Baʼzan bir hijo qilur qonimga tashna. — Gʻ. Gʻulom

ot Kosiblarning charm qirqadigan maxsus pichogʻi.

Togʻam Egamberdi qoʻlimdan gazanni yirib oladi-da, qiymalangan charmlarni yigʻishtiradi. — Oybek, Bolalik