Поиск

ot Chorva mollarining boshiga bogʻlanadigan arqon; noʻxta.

Sigir oʻgʻirlagan qutuldi, Boshvoq ushlagan tutildi. — Maqol

Oynisa endi sigirning boshvogʻiga qoʻl choʻzganini biladi, naq boshi ustida allanarsa qattiq gumburlab ketdi. — X. Sultonov, Onamning yurti

sft. 1. Boʻynida bogʻichi, arqoni, yugani yoʻq.

Goʻzal bogʻlarda, ekinzorlarda endi boshvoqsiz qoramollarning diringlab chopganini koʻrdi. — Oybek, Nur qidirib

2. koʻchma. Oʻz erkiga qoʻyib yuborilgan, nazoratsiz.

Ersiz xotin — boshvoqsiz ot. — Maqol

Boshvoqsiz qolgan nortuya nima-yu, el nazaridan qolgan odam nima? — S. Karomatov, Bir tomchi qon

Oʻgʻlimning feʼli oʻzimga ayon-da: boshvoqsiz qolsa, boshi oqqan tomonga ogʻib ketaveradi. — H. Nazir, Soʻnmas chaqmoqlar

3. koʻchma Erkin, ozod.

Boshvoqsiz davronni surmoqdaman xoʻp, Maza qilib qandimni urmoqdaman xoʻp. — R. Bekniyoz, Toʻtiyo

ot 1. Boʻshatib, yechib yuborilgan, boshvoqsiz.

Beboshvoq mol.

Sigir jonivorni yil-oʻn ikki oy beboshvoq qoʻydingmi — tamom, undan qoʻlingni yuvib, qoʻltigʻingga uraver. — Oʻ. Umarbekov, Yurak soʻzlari

Bizning dargohga yaqin joyda ikki yashar chamali bir ola tanacha beboshvoq oʻtlab yurar edi. — Gʻ. Gʻulom, Shum bola

2. koʻchma ayn. Bebosh 3, 4, 5, 6.

Betonchilarimiz orasida bir-ikkita beboshvoq bolalar bor, ular koʻpincha odamlarni ishdan qoʻyib, sandiroqlab yuradi. — Sh. Gʻulomov, Yorqin ufqlar

Azizxon elga nafi tegmaydigan beboshvoq yigit. — U. Normatov, Talant tarbiyasi

Chaqmoqday beboshvoq, toshqinday berahm, Lekin koʻzlaringda bir olam hayo. — Mirtemir