Qidiruv

ot 1. anat. fiziol. Bosh va orqa miyadan barcha aʼzolarga tarqalgan va ularning faoliyatini boshqarib turadigan juda ingichka nerv tomirlari tizimi va shu tomirlarning har biri.

Oʻzi yosh, asablari butun. — S. Zunnunova, Olov

2. Organizm faoliyati va inson xatti-harakatlarini oʻz ichiga olgan shunday tizimlar majmui.

3. Shu tizimlar majmuining holati.

Boboshning tarang asablari boʻshashib, yengil tortdi-da — A. Muxtor. Boʻronlarda bordek halovat

Goʻzal manzara ruhingizni bardam, asablaringizni osoyishta qiladi. — Saodat

4. Asabiy holat.

Adolat asabdan titrab, boshini ushlab, oʻtirib qoldi. — S. Zunnunova, Gulxan

sft. 1. Salga asabiylanaveradigan, boʻlar-boʻlmasga qizishib, tutaqib ketadigan; zardasi tez, jizzaki.

Asabiy kishi. Asabiy bola.

Otam asabiy odam edi. Shunday boʻlsa ham, meni qattiq urmagan va yomon soʻkmagan edi. — S. Ayniy, Esdaliklar

2. Asablarning qoʻzgʻalishi bilan bogʻliq.

Asabiy holat. Asabiy tovush.

— Begonadan ham battarsiz! — qizishib ketgan Xolisaning lablari asabiy titradi. S. — Nurov, Narvoy

Yuzini asabiy timdalayotgan onasining ahvoliga achinibmi, ayol jahldan tushdi. — Yoshlik

ot 1. ayn. Asab.

Uning asabiyatga teguvchi soʻzlari har kuni Saidiyning yeganini zahar-zaqqumga aylantirar edi. — A. Qahhor, Sarob

2. Asabiy holat; asabiylik.

[Hakim boyvachchaning] Rangi oʻchgan harakatlarida qoʻrquv va asabiyat sezilardi. — Oybek, Tanlangan asarlar

ot Asabiy holat.

Elbek oʻz kabinetiga qaytgandan keyin asabiylik bilan nari-beri yurib, uzoq oʻyladi. — A. Muxtor, Tugʻilish

ot Asab bilan oʻynashish.

E, kattakoning bilan qoʻshmozor boʻl, deb oʻyladi Yaxshiboyev, bunaqa asabbozlikda sogʻayib boʻladimi. — M. M. Doʻst, Lolazor

fl. ayn. Asabiylashmoq.

— Nima qilay, qoʻlimdan kelgan butun yaxshilikni qilib koʻrdim, — choy hoʻpladi Mahmudov va asabiylanib, titrab, gʻazab bilan soʻzida davom etdi. — Oydin, Koʻngil toʻldimi, yaxshi yigit