ot 1. Yeyiladigan, ovqat uchun isteʼmol qilinadigan narsa; oziq-ovqat.
Ziyofatlarga borganda-ku, yoniga oʻtirib olib, tarelkasiga yegulik toʻldirish bilan band boʻlardingiz. — M. Hazratqulov, Jurʼat
Dasturxonni yoz! Yegulik narsang bormi? — Choʻlpon, Kecha va kunduz
2. Oʻz ehtiyoji uchun ekilgan yoki ajratilgan narsa, oziq-ovqat haqida.
Yegulik qovun. Yegulik un.
Qolgani — bola-chaqamga yegulik. Jamoa tekshirib koʻrgan. Botiralidan soʻrang! — H. Gʻulom, Mashʼal
Shunda Binoiy yodaki bir ruboiy aytib, yegulik gʻallasi yoʻqligini, kiyay desa, gʻallaning qopi ham topilmasligini aytdi. — P. Qodirov, Yulduzli tunlar
3. Yeyish uchun kerakli, yeyishga yetarli.
Bu yil yaxshi meva qilmadi-yu, har qalay yegulik topiladi. — S. Siyoyev, Yorugʻlik