Қидирув

от 1. Қатъият билан қилинган сўров, илтимос.

Лекин нима қилсин, раҳбарнинг буйруғи, талаби. — Ҳ. Шамс, Душман

Замира кўпчиликнинг талаби билан ўрнидан турар экан, қизил атлас кўйлагининг ранги юзига ургандай, қип-қизариб кетди. — П. Қодиров, Уч илдиз

2. Бажарилиши, бўлиши шарт ва тақозо этиладиган нарса (нарсалар).

Олий ўқув юртига кириш талаблари. Стандарт талабларига жавоб бермоқ.

Бироқ жангнинг энг масъулиятли пайтида устав талабини бажариш имкони бўлмади. — И. Раҳим, Чин муҳаббат

Мантиқ талаби шу эрур, шоҳим. — С. Сиёев, Ёруғлик

3. Эҳтиёж, истак.

Унинг талаби катта. Маданий молларга талаб кучаймоқда.

Ҳозирча у бу ҳужжат билан мамлакат талабини қондиришга — маориф фронтига боради — П. Турсун, Ўқитувчи

4. иқт. Харидор, истеъмолчининг бозор-да муайян товарларни, неъматларни сотиб олиш истаги.

Муайян товарга ёки товарлар тўпламига барча харидорлар билдирган талаб йиғиндиси бозор талаби дейилади. — Ўзме

5. с. т. Талабгор, хоҳловчи.

Талаб борми?У билан курашишга талаб чиқмади.

Кулич келиб ялаб-ялаб, Икки ёв урушга талаб. — Ширин билан Шакар

6. сфт. Отларга бирикиб, ўша отдан англашилган нарсани истайдиган, унга муҳтож, талабгор маъносини билдиради (Бундай бирикмаларнинг аксарияти қўшма сўзга айланган).

Сув талаб экинлар. Изоҳ талаб ибора. Чопиқ талаб ғўзалар.

Ўктамнинг қовжироқ лаблари чойталаб эди. — Ойбек, Олтин водийдан шабадалар

Чунончи, Алпомиш, Манас —умр бўйи тирноқ кўрмай, фарзанд талаб бўлиб юрган чол ва кампирнинг ўғиллари. — Ғ. Саломов, Таржима назариясига кириш

от Олий ёки ўрта махсус ўқув юрти ўқувчиси.

Мадраса талабалари “аъло”, авсат ва адно номи билан уч гуруҳга бўлинган эди. — М. Муҳаммаджонов, Турмуш уринишлари

Йигиталининг ҳамхонаси — ҳозир институт талабаси Ғолибжон уйга бориб келаман, деётгандай бўлувди. — Д. Нурий, Осмон устуни

Билим юрти талабаларининг ҳаёти ҳар томонлама сермазмун ўтмоқда. — Газетадан

от 1. Талаб қилувчи; истовчи, хоҳловчи.

Баковул даврага чорлади: — Насим полвонга талабгор бўлса — чиқсин! — Т. Мурод, Қўшиқ

Талабгорлар кўп, аммо сизга ўхшаган катта олимлар иштирок этишини тайинлашган эди. — Мирмуҳсин, Умид

Келиб ҳар шаҳр-у қишлоқдан талабгор, Олурлар қанча бўлса илм даркор. — Ҳабибий

2. эск. айн. Даъвогар 2.

от Талаба бўлиш, студентлик.

сфт. 1. Бажариш, амалга оширишни қатъий туриб талаб қилувчи, бу ёʻл-да оғишмайдиган.

У деканнинг иш юзасидан ҳар қандай яқинликни йиғиштириб қўйишини, талабчан, қаттиққўллигини, ҳеч кимни аяб ўтирмаслигини яхши биларди. Ў. — Ҳошимов, Қалбингга қулоқ сол

Ўртоқ Раҳимжонов ўз касбига муҳаббат билан қарайдиган, масъулиятни ҳис қиладиган, талабчан агрономдир. — Газетадан

2. Юксак талаблар қўювчи, юқори даражани кўзлаб фаолият кўрсатишни талаб қилувчи.

Расмнинг тагига: Ўжар шогирддан талабчан устозга деб ёзилган. — Гулдаста

Талабчан, меҳнаткаш шоир Ҳамид Олимжон қисқа умри ичида жуда катта маданий мерос қолдирди. — Н. Сафаров, Оловли излар

3. Талаб жиҳатдан ва баҳолаш савияси юқори.

Талабчан китобхонлар.

Бир йилнинг тўққиз куни филми талабчан томошабинларимизнинг юксак дидига мосдир. — Газетадан

Ҳа, йилдан йилга иш салмоғи ортиб боряпти, одамлар эса талабчан бўлиб кетишяпти. — Муштум

4. кўчма Кўп талаб қиладиган.

Бодринг иссиқсевар, ёруғсевар ва намга талабчан ўсимлик. — Фан ва турмуш

от Бирор нарсани талаб қилиб ёзилган хат, ҳужжат.

Талабнома ёзмоқ. Талабнома билан мол олмоқ.

Участкалардан келиб турган талаблар, докладномалар янги-янги чизмалар сўралган талабномаларнинг саноғи бўлмайди баъзан. — Ж. Абдуллахонов, Тўфон

Қўлига қўшимча зарур материаллар ёзилган талаб-номани тутқаздим. — Ҳ. Назир, Кўктерак шабадаси