Qidiruv

ot 1. tar. Sobiq Ittifoqda: sovet rublining oʻzbekcha nomi; rubl.

Bir soʻm. Uch soʻm.

Provodnik bir dasta kulrang choyshab, bogʻichi uzilgan yostiq jildlar olib keldi, juvon bilan Nusratbek bir soʻmdan toʻlab olishdi. — S. Nurov, Maysalarni ayoz urmaydi

Men gʻisht kukuni qoʻshilgan guruchni devzira deb, kilosini toʻrt soʻmdan sotaman. — S. Ahmad, Yulduz

2. Oʻzbekiston Respublikasining asosiy pul birligi (1994 yil 1 iyuldan).

Ikki yuz soʻm. Ming soʻm.

Soʻmning muomalaga kiritilishi Oʻzbekiston pul muomalasi va hisob-kitoblar tizimini tashkil etish hamda respublika iqtisodiyotini rivojlantirishda muhim ahamiyatga ega boʻldi. — OʻzME

sft. 1. Eshituvchi, tinglovchi.

Koʻpincha Abu Ubayd Kitob ush-shifo dan bir bobni oʻqir, unga diqqat bilan quloq solib oʻtirgan somelar, tushunmagan yerlarini soʻrar edilar. — M. Osim, Karvon yoʻllarida

Xotira yigʻlatar nayga aylanib, Sel boʻlib tin olar some Registon. — A. Isroilov, Biz — dunyo odamlari

Sevargul oʻychanlik bilan choʻnqayib, tilovatga some oʻtirarkan, tagʻin beixtiyor taajjublandi. — N. Qilichev, Chigʻiriq

2. din. Qurʼon oʻqiyotgan qori yanglishganda yoki unutib toʻxtab qolganda luqma solib turuvchi ikkinchi qori.

sft. Shimoliy va Sharqiy Afrikada, shuningdek, Old Osiyoda yashagan va som tillari oilasiga kiradigan tillarda soʻzlashgan qadimiy (amoriylar, finikiylar, ossuriylar, oromiylar, suryoniylar va boshqalar) va soʻzlashuvchi hozirgi (arablar, amxarlar, Isroil yahudiylari, suriyaliklar) xalqlar.

Fandagi maʼlumotlarga koʻra, somiylarning ajdodlari qadimda Sahroyi Kabirning shimolida yashagan deb taxmin qilinadi. — OʻzME

sft. s. t. ayn. Soʻmlik.

ot Bugʻdoy, arpa, sholi yanchilganda, poyalarining ezilib maydalanishidan hosil boʻladigan, mahalliy binokorlikda va yem-xashak sifatida ishlatiladigan mahsulot.

Mayda somon. Yirik somon. Mollarga somon bermoq. Uzoqning bugʻdoyidan yaqinning somoni afzal. — Maqol

U yarim oydan beri pichan tayyorlash, beda oʻrish, somon hozirlash bilan band. — I. Rahim, Hayot buloqlari

ot Yoyilgan xamirga goʻsht, qovoq va shu kabilar solib tugib, odatda tandirga yopib, shuningdek, gaz duxovkalarida ham pishiriladigan yegulik.

Goʻsht somsa. Qovoq somsa. Ismaloq somsa. Somsa yopmoq.

Sut-qaymoqqa yoʻgʻrilgan jimjimador patir kulchalar, hali sovimagan tandir somsalar hammasi farosat, did bilan qoʻyilgan. — S. Anorboyev, Oqsoy

Oshxona derazasi yonida turib, somsa yasayotgan uygʻur yigit ham goʻzal qizdan nigohini uzmasdi. — Mirmuhsin, Umid