ot 1. Yer yuzida keng tarqalgan, xavfli kasalliklar tarqatadigan kichik kemiruvchi sutemizuvchi hayvon.
Shu payt ammamning yaqinda bolalagan targʻil mushugi, ogʻzida sichqon tishlagancha, uyga kirib ketdi. — R. Azizxoʻjayev, Yashil chayla
Qayerdadir yulgʻun tagida choʻl sichqonimi, nimadir nogoh shitirladi-yu, Zulxumor choʻchib tushdi. — M. Mansurov, Yombi
2. Muchal yil hisobida birinchi yil nomi.
Uning yili — sichqon.
- Sichqoncha Kompyuter va boshqa baʼzi raqamli qurilmalar ekranidagi koʻrsatkichni (kursorni) qoʻlda boshqarish uchun ishlatiladigan, har xil amallar bajarish uchun moʻljallangan ikki yoki undan ortiq tugmalarga ega qoʻshimcha qurilma.
- Sichqon yili Muchal yil hisobida birinchi yil.
- Arslonning oʻligi — sichqonning tirigi Katta martabali kishi martabasidan tushganda ham, oddiy kishilardan yuqori turadi, kattaligicha qoladi, degan maʼnodagi ibora.
- Sichqon sigʻmas iniga, gʻalvir bogʻlar dumiga Imkoniyatlarini hisobga olmay daxmaza orttirgan kishiga nisbatan aytiladigan maqol.
- Sichqon surdi Kasallikdan endigina tuzalgan kishi birinchi bor uyidan chiqib, biror joyga borganda aytiladigan ibora. — Hamzaxonni bugun-erta sichqon surdi qilib, koʻchaga olib chiqamiz, xolajon, xudo xohlasa, — dedi Umar polvon qoʻlidagi tugunni Jahonbuviga uzatib. — K. Yashin, Hamza
- Sichqonning ini ming tanga Qochishga joy topa olmay qolingan paytda aytiladigan ibora. Madrasalar ham jimjit, falakiyot mudarrislari, handasa-yu riyoziyot mullolari uchun sichqonning ini ming tanga boʻlib ketgan edi. — Mirmuhsin, Meʼmor