ot
1.
Saqlab berish, vaqtincha foydalanish yoki boshqa bir kishiga eltib berish uchun topshirilgan.
Omonat xat. Omonat pul.
2.
Omonatga saqlangan pul va boshqalar narsa, buyum.
Anov kuni qoʻyib ketgan omonatga keldim. — I. Rahim, Chin muhabbat
Omonatlarni egalariga topshirganimizdan keyin, mayli kuyovtoʻra qizimizni Makkaga olib borsalar ham, monelik yoʻq. — I. Oʻktamov, Hikoyalar
3.
Mijozning maʼlum bir shartlar asosida bankka qoʻygan pul mablagʻi.
4.
Nomigagina, shunchaki; zoʻrgʻa.
Chol supadagi yogʻoch soʻriga omonat ilinib, niyatini aytishga soʻz topolmay qiynaldi. — Yoshlik
Toʻychi poygakdagi choʻyan pech ustiga omonat oʻtirdi-da, yerga qaragancha, indamay, papirosga zoʻr berdi. — A. Koʻchimov, Halqa
5.
Vaqtinchalik.
Odam — omonat, diydor — gʻanimat. — Maqol
Jiyan ijara uyda omonat oʻtirdi. — Yoshlik
6.
Puturdan ketgan yoki zoʻrgʻa ilinib turgan.
Omonat bino.
Oshpaz kosaga lagʻmon suzib, yoʻnilmagan taxtadan omonat yasalgan stol ustiga qoʻydi. — S. Ahmad, Ufq
- Omonat daftarchasi Omonat kassaga pul qoʻyilgani haqidagi shaxsiy hujjat.
Salimxon Obidiy allaqanday zarur hujjatlarni, omonat daftarchasini roʻmolga tugdi. — Mirmuhsin, Umid
- Omonat kassasi Fuqarolarning pulini vaqtincha saqlab beradigan muassasa.
- Omonatini topshirmoq Vafot etmoq, olamdan oʻtmoq.
Kampir uyga kirgan-u, shu qisqa fursat ichida choli toʻshakka beozor choʻzilganicha, omonatini topshirib qoʻyganining guvohi boʻlgan. — Yoshlik
