ot 1. Mendeleyev davriy sistemasining I guruhiga mansub kimyoviy element; sariq-qizgʻish tusli qimmatbaho nodir metall; zar: tilla.
Sof oltin. Oltin soat. Yoʻqolgan pichoqning sopi oltin. — Maqol
Direktor oʻsha terilar uchun koʻrgazmaning oltin medalini oldi. — S. Ahmad, Yulduz
Xomtok qilingan ishkomda husayni uzumlar oltindek tovlanmoqda. — I. Rahim, Ixlos
2. koʻchma Har qanday qimmatbaho yoki aziz narsa haqida.
Yer —xazina, suv — oltin. — Maqol
Doʻst-yorlar ahil boʻlsa, Choʻlda oltin undirar. — Maqol
Qoʻshiq aytib kelaman qir yoqalab. Gulchechaklar teraman Sir yoqalab. Ter toʻkib yetishtirgan oltinimiz Turadi chanogʻida bizga qarab. — Folklor
3. Shu metalldan zarb qilingan pul.
Homid yonchigʻini chiqarib, bir qoʻlidan ikkinchi qoʻliga oltinlarni sanab tushira berdi. — A. Qodiriy, Oʻtgan kunlar
Bunchalik dabdaba, albatta, xazinadagi oltinlar kuchi bilan boʻlgandir, deb baʼzilarning koʻngliga kelar. — A. Qodiriy, Mehrobdan chayon
4. sft. koʻchma Qimmatli, bebaho (fikr, gap, soʻz, ish, vaqt va shu kabilar haqida).
Oltin yoshlik. Yosh chogʻim — oltin chogʻim. — Maqol
Kam boʻlmang, raisim, oltin soʻzlarni aytdingiz. — Sh. Rashidov, Boʻrondan kuchli
Amuning boʻyida kezardim tanho. Shu oltin damlarni sezardim tanho. — Gʻayratiy
- Oltin suvi Oltin suvi yugurtirilgan soat.
- Oltin bosh Yaxshi idrok etadigan, yaxshi ishlaydigan bosh, oʻtkir aql; shunday bosh, shunday aql sohibi. Nihoyat, Qoratoy Yoʻlchining yelkasini doʻstona qoqib dedi: — Rosa boshing bor, inim Yoʻlchi, oltin boshing bor. Gaplaring bari haq. — Oybek, Tanlangan asarlar
- Oltin vodiy Noz-neʼmatlarga boy, obod, yashnagan vodiy.
- Oltin kuz Yilning hamma narsa gʻarq pishgan toʻkin-sochin payti, moʻl-koʻlchilik fasli. Bahor boʻyi, yoz boʻyi zarrama-zarra yiqqan bunyodini buyuk saxovat bilan dehqon etagiga solayotgan mana shu oltin kuzda uning yuragi qafasdan chiqqan qush yuragiday yayray boshladi. — M. Ismoiliy, Fargʻona tong otguncha
- Oltin odam Juda yaxshi odam, tengi-misli yoʻq odam.
- Oq oltin Paxta.
- Qora oltin Neft yoki koʻmir.
- Qoʻli oltin Yoki oltin qoʻl Har ishga mohir qoʻl va shunday qoʻlli kishi. Sizlarni koʻrganimda Oltin qoʻl albatta tushar esimga. — X. Saloh.