фл. 1. Паст томонга қараб узлуксиз, сурункасига ҳаракат қилмоқ, юрмоқ (суюқлик ҳақида).
Олдингдан оққан сувнинг қадри ёʻқ. — Мақол
Қонқус тун бўйи ғазаб билан, алам билан тўлғаниб оқди. — Ў. Ҳошимов, Қалбингга қулоқ сол
Филатовнинг бир қўли қон оқаётган елкасида, иккинчи қўли пулемёт лентасида, боши қуйи солинган эди. — А. Қаҳҳор, Олтин юлдуз
2. Тез-тез томмоқ, бирин-кетин юмаламоқ (томчилар ҳақида).
[Қизнинг] Кўзларидан оққан томчилар қуёшда инжудай ёнади. — Ойбек, Танланган асарлар
Ошно дўстининг кўзларидан дув-дув ёш оқаётганини кўрди, хўрланди — М. М. Дўст, Лолазор
3. Сув оқими билан бирга силжимоқ, сузмоқ.
Келганлардан бир қисми сойнинг ўртасига етмасдан қайтишга мажбур бўлди. Икки киши оқиб кетаёзди. — А. Қаҳҳор, Олтин юлдуз
4. Қуйилиб келмоқ; ўтмоқ.
Ўтказгичлардан электр токи оқа бошлади.
5. кўчма Келиб, тушиб турмоқ.
Конвеерлардан дон оқади.
Хона ичига қуёшнинг илиқ ёрқин ипаги жимгина оқди. — Ойбек, Навоий
6. Жараён тарзида, кўплашиб бирор томонга юрмоқ, ўтмоқ.
Отлиқлар Оқмачит қири томон оқиб борарди. — Т. Ашуров, Оқ от
Эрталабдан бошлаб қишлоқ аҳолиси мактаб томон оқди. — П. Турсун, Ўқитувчи
7. Тўкилмоқ, осилиб тушмоқ.
Икки атрофда пахтасининг чўғи қочган далалар гоҳ чўп бўлиб ғўзапояси қолган, гоҳ пахтаси эгатларга оқиб тушган пайкаллар билан алмашинади. — М. Мансуров, Ёмби
8. кўчма Ўтмоқ, кечмоқ.
Ҳаёт бир маромда, бир изда оқа бошлади. — С. Абдуқаҳҳор, Кўзлар
Йиллар оқар йилларни ювиб, Тақдирига тан берар ҳавас. — А. Шер, Қадимги куй
- Оқиб келмоқ Мунтазам келиб, тушиб, етишиб турмоқ. Арзимас амалини, оқиб келиб турган ҳаром-хариш пулларини деб, жуфти ҳалолидан кечган кимсани нима деб аташ керак?! — М. М. Дўст, Ёмби